Debosyon sa 68-anyos nga inahan

CEBU, Philippines - Bisan og maglisod og barug ug dili makalakaw og layo tungod sa gihambin niining sakit sa bukog wala kini makapugong sa 68-anyos nga biyuda nga si Rustica Quirubin sa pagsimba kanunay diha sa Basilica Minore del Santo Niño.

“Bisan og wala ko’y kuyog maningkamot ko nga makaari gyud sa Santo Niño aron mosimba, tanang mga gipangayo nako gihatag sa Santo Niño”, matud ni Nanay Rustica,  residente sa T. Padilla Extension, Dakbayan sa Sugbo.

Usa sa gipangayo ni Nanay Rustica nga magdako unta nga buotan ug malampuson sa ilang pag-eskwela ang tulo niya ka mga anak kinsa pulos lakake.

Si Nanay Rustica dunay tulo ka anak kinsa ang kamaguwangan si Librando, 45-anyos, usa ka Overseas Filipino Worker (OFW), Patricio, 42, atoa magbase sa Estados Unidos apan ang kamanghuran niyang anak hapit na 20 ka tuig kini nga namatay tungod sa digrasya sa motorsiklo.

Matud ni Nanay Rustica nga housewife lang siya kaniadto samtang ang iyang bana nagtrabaho isip utility diha sa Cebu City hall.

Niadtong tuig 2003 mitaliwan sa kalibutan ang bana ni Nanay Rustica tungod sa atake sa sakit niini nga high blood.

Dihang buhi pa usab ang iyang bana matud ni Nanay Rustica kanunay usab silang magkuyog sa pagpanimba.

“Successful ko bahin sa akong mga anak, nakahuman og eskwela bisan ordinaryo kaayo ko, bisan tuod og pulos laki akong mga anak buotan ra sad sila nga gihatag sa Ginoo diri nako,” pasigarbo ni Nanay Rustica.

Matud usab ni Nanay Rustica nga kanunay usab niyang gipangayo sa Santo Niño nga hatagan siya og igong kusog nga makaabot gyud diha sa basilica aron makasimba.

“Nalipay ko kay gatuo ko nga dili na gyud ko ka simba tungod kay kung wala ko’y kuyog di man ko kahimo kay banhod man ning akong tiil matumba man ko kung walay mag-agak nako, apan tabangan gyud ka ni Senior Santo Niño tungod kay miuli akong anak ug maoy midala nako diri,” ni Nanay Rustica pa.

Apan kung dili makauli nganhi sa Pilipinas ang iyang mga anak ang iyang umagad maoy mokuyog niya sa pagsimba.

“Ug dili usab ko nila kuyogan maningkamot man sab ko bisan ako lang usa,” matud ni Nanay Rustica.

Gibutyag niya nga mihangyo siya sa iyang mga anak nga palitan siya og wheel chair kay kung walay makakuyog niya duna siya silbing magunitan o malingkuran aron dili siya matumba.

Gipaambit ni Nanay Rustica nga ang iyang kanunay pagsimba ug debosyon kang Senor Sto. Niño nasunod niya kini sa iyang inahan kaniadto.

Nagsugod pa lang siya og eskuyla sa elementarya kaniadto kanunay na silang dalhon sa ilang inahan sa pagsimba diha sa basilica.

Ang inahan ni Nanay Rustica nag-alagad sa una diha sa basilica isip kolektora sa mga halad ug katekista usab ang iyang inahan kaniadto. Matud usab ni Nanay Rustica nga miyembro usab kaniadto sa 3rd order sa San Jose ug Legionary usab kaniadto sa cathedral ang iyang inahan.

Tuig 1978 nagsugod ang sakit ni Nanay Rustica sa iyang spinal column nga maoy hinungdan nga dili siya makadugay og barog kay magbanhod ang duha niya ka bitiis.

“Sukad pa kaniadto hangtud karon bisan og nasakit ko wala gyud ko’y undang-undang sa pagsimba kang Santo Niño, kada Biyernes nia gyud ko (Basilica),” butyag ni Nanay Rustica. (BANAT NEWS)