Counter-terrorist unit nangabot na

CEBU, Philippines - Niabot na sa Sugbo ang usa ka platoon sa Light Reaction Company (LRC) sa Armed Forces of the Philippines.

Kini isip dugang pwersa sa seguridad sa mga kalihukan sa Sinulog sa Dakbayan sa Sugbo.

Ang LRC maoy usa ka counter-terrorist unit sa Philippine Army.

Samtang gawas sa mga unipormadong polis, daghan sab nga mga nakasibilyan nga sakop sa kapolisan ang ipakatap atol sa fluvial, solemn procession ingon man sa Sinulog grand parade.

Si Police Regional Office-7 Director Noli Taliño niingon nga ang naka-sibilyan kabahin na sa walo ka libo ka polis nga mobantay sa Sinulog kauban ang kasundaluhan ug mga force multipliers.

Si Taliño niklaro nga hangtud karon walay bisan unsa nga hulga nga ilang nadawat sa Sugbo.

“Hindi ko sinasabi na walang threat, paulit-ulit kong sinasabi na walang specific o imminent threat pero yung pangamba nang terorismo ay nandiyan lagi, saang lugar naman pwede targetin. Ginagawa natin ang lahat ng paraan para sa ganun masigurado natin ang security ng kababayan na mag-attend ng Sinulog,” matud ni Taliño.

Dunay mga K9 dogs ang ipakatap sa nagkadaiyang dapit ilabi na sa mga lugar nga dunay mga kalihukan nga himoon.

Samtang gumikan sa pagpawong sa signal sa mga cell sites, dili mominus sa 400 ka handheld radios ang ipangapod-apod sa kapolisan lakip sa auxiliary forces nga mobantay sa seguridad sa Sinulog Grand Parade ug Solemn Procession.

Matud ni Konsehal Dave Tumulak, deputy mayor for police matters sa Siyudad sa Sugbo, nga ang mahatagan sa handheld radios dunay identification card gikan sa Sinulog Foundation Inc. Alang niadtong mga dunay radyo apan walay pagtugot gikan sa National Telecommunications Commission, hayan imbarguhon kini sa tinugyanan sa balaud tungod sa isyu sa seguridad.

Subay niini, giangkon ni kanhi mayor Michael Rama nga nakurat siya sa pagpawong sa signal sa mga cell sites.

Siya nidugang nga sa 15 ka tuig nga siya ang nangulo sa Sinulog wala nahitabo nga gipawong ang cell sites bisan pa man og dunay hulga nga nadawat.

Samtang ang pagpawong sa signal sa cell sites ang natuki sab atol sa final briefing sa mga contingents sa Sinulog kagahapon.

Si SFI executive director Ricky Ballesteros niawhag sa mga contingent nga magmabinantayon basin may masagol nga lain sa ilang grupo nga maoy mohimo sa kasamok.

Sa kinatibuk-an, 23 ka contingents ang moapil sa Sinulog Grand Parade diin 11 niini alang sa Free Interpretation ug 12 ang Sinulog-Based category. Jojo C. Ugdol ug Decemay P. Padilla (BANAT NEWS)