Mga Talisaynon gipasidunggan

CEBU, Philippines - Nibida sa ika-16 nga Charter Day sa Dakbayan sa Talisay kagahapon ang nakahatag og dungog sa siyudad ingon man ang mga kompaniya nga nakahatag og dagko nga buhis ug daghang empleyado nga Talisaynon.

Nidawat sa ilang pasidungog mao ang Cebu Southland Commercial Company, Inc.; Dynasty Management and Development Corp., Ricor Mills Corp., Wilcon Depot Inc., Shurline Corporation (Atlantic Hardware), First Pacific Fortune Commercial Corp. (Gaisano Capital-SRP), Crown Communities Inc., Freemont Foods Inc. (Jollibee-Tabunok), Geo-Transport & Construction, Inc. and Limchua Development. Corp.

 Samtang ang lima ka kompaniya nga adunay daghang Talisaynon nga empleyado mao ang CASA Cebuana Incorporada, Cebu Suntech Manufacturing Corp., Cebu Southland Commercial Complex Inc., First Cebu Artcraft Corp. ug Vermedes Inc. base sa tuig 2015 hangtud karon.

Ang mga indibidwal nga taga Talisay nga nihatag og dungog sa siyudad mao sila si Ofelia Hermosa, schools division superintendent sa Bayawan City Negros Oriental nga awardee sa 2017 Garbo sa Talisaynon nga nilampos sa natad sa edukasyon; Humildad Daclan, ang trainer sa Talisay Rondalla sukad pa niadtong 1990 sa natad sa culture and arts; Engineer Oscar Tabada, director sa Philippine Atmospheric Geophysical and Astronomical Services Administration sa Visayas.

Makadawat sab og pasidungog ang duha ka inilang atleta nga sila si Kit Ceron Garves sa boxing ug si basketball player Roger Ray Pogoy nga naa karon sa Philippine Basketball Association (PBA) nga usa sab sa mga pambato sa Gilas Pilipinas.

Kagahapon walay klase ang tanang ang-ang samtang walay trabaho ang mga mamumuo sa gobiyerno sa Talisay. (BANAT NEWS)