CEBU, Philippines - Mga pharmacists ug assistant pharmacist sa usa ka botika nga nahimutang sulod sa mall sa North Reclamation Area gikiha sa ilang kostumer og kasong “reckless imprudence resulting to serious physical injuries” kay giingong dili mao ang gihatag niining tambal ngadto kaniya.
Si Phoebe Tejero, hingkod ang panuigon, residente sa Brgy. Poblacion, lungsod sa Compostela sa iyang affidavit nga giluwatan ngadto sa iyang abogado nga si Atty. Rene Abcede, Jr. nagkanayon nga niadtong Disyembre 7, 2016 miadto siya sa maong botika aron mopalit og “Cefalexin”, tambal nga gi-prescribed sa iyang doktor nga si Dr. Yvonne Yu-Olanda.
Si Tejero mipasangil nga ang nahisgutang mga pharmacist mihatag kaniya og sayop nga tambal “Eltroxin” (Thyroid Hormone nga tabletas) diin wala siya’y kalibutan nga dili diay mao ang tambal nga gihatag.
Matud ni Tejero nga sa pagtuo nga mao kadtong tambal nga gi-prescribed sa iyang doktor mitomar siya niini sulod sa pito ka adlaw.
Ang maong pagtomar niya sa sayop nga tambal miresulta sa grabeng sakit sa iyang ulo ug irritable kaayo siya niini.
Human sa mao niyang gipamati miadto siya sa usa niya ka doktor nga si Dr. Vincent Echin aron siya mahiling.
Dinhi na niya mahibaw-i nga tungod sa pagtomar niya og sayop nga tambal maoy hinungdan sa iyang nasinati nga grabeng panakit sa ulo.
Matud ni Tejero nga si Dr. Echin naalarma ug mirekomendar kaniya og Thyroid Panel.
Si Tejero mipasangil nga imbes mobayad og danyos sa iyang gidangatan gihatagan lang siya og tambal sa maong botika.
Niadtong Enero 6, 2017, si Tejero ug mga opisyal sa botika nag-meeting diin giingong ang maong mga opisyal nangayo og pasaylo ngadto kaniya tungod sa nahimong negligence sa ilang mga pharmacist.
Ang maong giingong negligence sa pharmacists nakompirma sa pagpahigayon og kaugalingong imbestigasyon sa botika.
Si Tejero nanghinaot sa Cebu City Prosecutor nga unta ang information sa kaso nga iyang gipasaka batok sa maong mga pharmacists maduso ngadto sa korte.
Si Atty. Abcede nagkanayon nga ubos sa Civil Code of the Philippines ug Revised Penal Code ang maong botika adunay liable sa pagbayad og mga danyos ngadto sa iyang kliyente.
Niawhag sab ang maong abogado sa nahisgutang botika nga sulod sa lima ka adlaw mobayad kini og P300 mil nga danyos ngadto sa iyang kliyente. (BANAT NEWS)