CEBU, Philippines - Mga opisyal sa Santa Clara University (SCU) nga gikan sa California, USA ang tuyo nga nibisita sa University of San Carlos (USC) uban sa mga sakop sa Ramon Aboitiz Foundation Inc. (RAFI) alang sa panagtambayayongay pagtabang sa pagpapas sa kakabus.
Ang SC University gipangulohan sa ilang university president nga si Fr. Michael Engh, SJ, ang USC gipangulohan ni Fr. Dionisio Miranda, SVD, ang university president sab sa maong tunghaan samtang si Jon Ramon Aboitiz usab ang nangulo sa RAFI diin nilanat og usa ka oras ang pagbinayloay nila og mga huna-huna alang sa usa ka mahinungdanong pagtinabangay.
Matud ni Fr. Miranda nga daku kaayo ang ilang kahinangop sa makasaysayanong pakig-alayon sa Santa Clara University pinaagi sa RAFI kay tumong niini mao nga matubag ang tanang pangina-hanglanon uban sa tuyo nga papason ang kakabus pinaagi sa pagtabang sa mga gagmay’ng magpapatigayon.
Dugang ni Miranda, makigtagbo pa siya sa iyang team aron tukion ang mga angay nga buhaton sa ilang pakig-alayon sa Santa Clara University, RAFI ug sa ilang tunghaan.
Sa iyang bahin si Fr. Engh nitug-an nga daku kaayo ang ilang kalipay nga bisan sa ka-busy ni Fr. Miranda gihatagan sila og panahon aron madungog ang ilang mga tinguha alang sa ilang pagtinabangay.
Dugang niini nga ilang tinguha nga makatabang sa mga nanginahanglan ilabi na sa mga kabus diin parte kini sa ilang pagtubag sa panawagan sa Santo Papa nga Mercy and Compassion.
Gitug-an ni Engh nga usa ka potential partner ang USC dinhi sa Sugbo, kay ubay-ubay na usab nga university ang ilang nakauban sa ubang nasud.
Samtang ang Dean sa School of Business and Economics Dr. Challoner Matero, kinsa maoy kasamtangang point person sa USC, nitug-an nga kinahanglan pa silang mag-research, tun-an ang maong panaghiusa ug unsay moguwa sa ilang pagtuon ila kining i-presentar sa matag habig.
Daku sab ang iyang kahinangop sa maong panagtambayayongay kay ang labing maayo nga practices maoy ilang iimplementar. (BANAT NEWS)