CEBU, Philippines - Mga mag-uuma sa Lungsod sa Alcantara ug Dumanjug nakadawat og mga hayopan alang sa panguma gikan sa Provincial Veterinary Office (PVO) niadtong milabay’ng Huwebes.
Ang maong lakang lakip sa Provincial Government’s Countryside Development program alang sa mga marginalized sector.
Tulo sa walo ka mag-uuma sa lungsod sa Dumanjug ang nakadawat og mga kabaw ug kompleto nga set sa daru, samtang ang lima matag usa niini nakadawat og baka.
Sila si Gobernador Hilario Davide, III, Bise Gobernador Agnes Magpale uban sa mayor sa Dumanjug nga si Efren Gica ug mayor sa Alcantara nga si Beatriz Caburnay ang nangulo sa pagpanghatag og mga hayopan ngadto sa mga beneficiary.
Si Davide mipasalig sa mga mag-uuma nga ang Kapitolyo mosuporta sa mga programa nga makatabang sa pagpauswag sa ilang panginabuhi samtang si Magpale mipasalig nga ang legislative department komitido sa paghatag og suporta sa mga proyekto sa gobernador.
Ang hepe sa PVO, Dr. Mary Rose Vincoy mibutyag nga miabot na ngadto sa 185 ka hayopan sa panguma ang nahatag sa Kapitolyo niadtong buwan sa Disyembre sa milabay’ng tuig ug miabot tanan ngadto sa P6 milyones ang kantidad.
Sa laing bahin, si Vincoy midasig sa mga mag-uuma nga mo-avail sa ilang cattle insurance program panagana nga ang ilang hayopan maapektahan kun dunay kalamidad.
Matud ni Vincoy nga libre ang maong programa ug ang Kapitolyo maoy mobayad sa insurance premium.
Gawas sa mga hayopan sa panguma, ang PVO nanghatag usab og mga rabies vaccine, vitamins ug fishing gears.
Dugang niini, ang Philippine Crop Insurance Corporation mitunol og tseke nga nagkantidad tanan ngadto sa P288, 980 ngadto sa 13 ka mga mag-uuma sa duha ka nahisgutang mga lungsod. (BANAT NEWS)