CEBU, Philippines - Suportado sa kapolisan sa Dakbayan sa Lapu-Lapu ang tinguha ni Mayor Paz Radaza nga dili na mohatag og permit alang sa disco ug tigbakay atol sa kapistahan sa usa ka barangay.
Kini aron malikayan ang mga dili maayong panghitabo sama sa pagpamomba, suma pa ni Police Chief Inspector Junnel Caadlawon, chief of operations sa Lapu-Lapu City Police Office.
Matud niya nga kini sab ang ilang girekomendar ngadto kang Radaza nunot sa nahitabong pagpamomba sa managlahing lugar sa Davao City ug sa Hilongos, Leyte.
“Paglikay pud sa panghitabo, ang mga pundok-pundok kay mao nay vulnerable nga mga parts (sa city),” matud ni Caadlawon. Ang maong lakang sa mayor usa ka direktiba nga gipasa ngadto sa mga barangay kapitan diin did-an na gyud ang pagpanghatag og permit aron luwas ang mga konstituwente.
“Daku kaayong pasalamat namo sa police kay at least gamay na lang among bantayanan,” matud ni Caadlawon.
Bisan sa positibong koordinasyon sa barangay, giklaro ni Caadlawon nga magpabilin gihapon ang hugot nga seguridad sa siyudad ilabi na nga duha ka international-related activities ang mahitabo sunod semana sama sa Miss Universe swimsuit competition sa JPark sa Enero 17 ug ang entrepreneurial meeting nga langkuban sa 48 ka nasud sa Shangri-La sa Enero 12 hangtud 16.
“Gitahasan gihapon nato ang kapolisan ana,” tataw ni Caadlawon bahin sa security preparation. (BANAT NEWS)