South bus terminal ibalhin na sa SRP?

CEBU, Philippines - Gitun-an sa kagamhanan sa Probinsiya sa Sugbo ang plano nga pagbalhin sa Cebu South Bus Terminal (CSBT) ngadto sa South Road Properties (SRP).

Kahinumduman nga gihugon-hugon nga ang probinsiya nagplano sa pagbalhin sa terminal ngadto sa Lungsod sa Minglanilla o sa SRP kay ang kasamtangan nga nahimutangan sa CSBT maghuot na kini tungod sa nagkadaghan nga pasahero.

Laing tumong aron usab maluag ang kahuot sa trapiko sa kadalanan sa N. Bacalso diin nahimutang ang maong terminal. Kaniadto si kanhi mayor Michael Rama misugyot nga sa lungsod sa Minglanilla o Talisay balhinon ang terminal. Apan ang Kapitolyo pabor kun anha kini balhinon sa SRP kay dili kaayo kini layo sa kasamtangan nga nahimutangan.

Ubay-ubay nga mga pasahero ug drayber sa bus ang wala mouyon sa nahisgutang plano kay giingong makahasol kini alang kanila kun ibalhin ang terminal.

Sa habig sa pasahero madugangan ang ilang gasto sa pamasahe kay imbes kausa lang sila mosakay gikan sa ilang nahimutangan magdoble na unya sila og sakay kun ang terminal ibalhin ngadto sa laing lugar.

Niining ulahi, kun ang land swap deal kalabutan sa 93-1 nga luna tali sa dakbayan sa Sugbo ug probinsiya makonkreto na, ang probinsiya giingong posibleng mobalhin sa CSBT sa SRP.

Matud ni Davide nga posibleng anha ibutang sa tipik sa 2.5 ektaryang luna nga lakip sa land swap deal sa dakbayan sa 93-1 nga luna sa probinsiya ang terminal. Dugang niya nga gikonsidera niya ang maong plano apan nagkinahanglan pa gyud kini og lawom nga pagtuon. -/DILT (BANAT NEWS)