CEBU, Philippines - Buot nga pugngan ni Lapu-Lapu City Mayor Paz Radaza ang mga Oponganon sa pagpahigayon og mga kalihukan sama sa disco ug tigbakay panahon sa pista sa matag barangay, subay kini sa nahitabong insidente sa pagpamomba didto sa Hilongos, Leyte niadtong Disyembre.
Si Mayor Radaza nagkanayon nga angay na lang molikay sa mga kalingawan sa matag barangay ug mas tagaan og prayoridad ang kaluwasan ug seguridad kay bisan gamay o daghan ang tawo, way gipiling lugar ang peligro.
Gitataw sa mayor nga iyang giabisohan ang mga barangay kapitan nga isuspenso una ang pag-isyu og permit ngadto sa mga gustong mopahigayon og kalingawan sa ilang lugar.
Misugyot sab kini nga kinahanglan mohatag sab ang mga kapitan og written document nga mopasabot nga gisuspenso o gi-deny ang request ug dili ipaagi sa pagsulti aron mopatuo ang mga residente.
Ang pagmatngon ug pagpaniid sab sa ilang area of responsibility maoy usa sab nga giabiso ni Radaza aron kun duna gani mga gidudahan nga tawo sa ilang lugar, angay kini nilang i-taho sa polis. -/DILT (BANAT NEWS)