CEBU, Philippines - Napatay sa mga sakop sa Philippine Drug Enforcement Agency (PDEA) ang usa ka suspetsadong drug pusher ug nadakpan ang tulo niya ka kauban nga nakuhaan og P15 milyones nga shabu atol sa operation didto sa Barangay Calamba, dakbayan sa Sugbo kaniadtong Miyerkules sa gabii.
Ang napatay sa PDEA mao si Rene Christopher Scholtiz, alyas Kano, nga nakigpinusilay sa mga sakop sa PDEA hinungdan nga siya napatay.
Nakuhaan siya og kalibre 45 nga pistola.
Ang tulo ka kauban ni Scholtiz nga nadakpan mao sila si Christie Diongzon, 37, Meralyn Monreal, 23, ug Eduardo Ramos, 36.
May kauban sila nga nailhan nga si Danny Bao nga nakaikyas.
Ang mga sakop sa PDEA nga gipangulohan ni Regional Director Yogi Felimon Ruiz mipahigayon og buy-bust operation sa Sun Valley Subdivision sa V. Rama Avenue dihang nasayod sila sa kalihukan sa mga suspetsado.
Target gyud sa mga operatiba sa PDEA mao si Diongzon human sila nakadawat og impormasyon kabahin sa ilegal niya nga negosyo sa drugas. Dihang napalitan na og shabu ang mga suspek, mihamag ang mga ahente sa PDEA, apan mibunot og armas si Scholtiz.
Nakuha sa mga PDEA agents ang daghang shabu nga gibana-banang mokantidad og P15.6 milyones. Apan ang mga dinakpan nanghimakak nga sakop sila sa sindikato sa drugas.
Nasayran sa PDEA nga ang mga dinakpan mga sakop ni Jongjong Baldezamo nga matud pa kanhi drug lord sa Sugbo ug anaa na karon sa Cebu City Jail, Ang igsuon ni Baldezamo napriso usab sa Muntinlupa, diin didto matud pa gikan ang shabu nga nakuha gikan kanila.
Apan ang mga dinakpan nihimakak sa pasangil kay matud ni Ramos nga natulog siya dihang adunay nanuktok sa ilang panimalay ug kalit lang siyang gidakop.
Samtang si Monreal miingon nga nagtindog ra siya gawas sa ilang panimalay dihang giapil siya pagdakop.
Samtang miabot sab sa kapin sa P500 mil ang kantidad sa shabu nga nasakmit sa mga sakop sa San Nicolas Police Station gikan sa usa ka drayber og motorsiklo nga apil sa nasita sa mga polis sa Carlock Street, Barangay San Nicolas Proper ning dakbayan sa Sugbo kagahapon sa kadlawon.
Ang dinakpan nga si Enrique Valencia Jr., alyas Jun-jun nakuhaan og mga 50 gramos nga gituohang shabu ingon man .38 kalibre nga revolver. Giandaman na og mga kaso ang mga dinakpan. -/RUB (BANAT NEWS)