16 anyos namusil tungod sa kwarta

CEBU, Philippines - Duha ka mga tawo ang patay sa managlahing pagpamusil nga nahitabo sa dakbayan sa Sugbo gikan sa kaadlawon hangtod sa udto kagahapong adlawa, usa sa mga suspek 16 anyos tungod sa kwarta.

Sa duha ka mga pagpamusil pulos personal nga kasuko ang nakita nga motibo sa kapulisan ug walay labot ang problema sa drugas.

Pasado ala una sa kaadlawon, patay ang usa ka 30 anyos nga lalaki human kini pusila sa iyang silingan nga 16-anyos diha sa Abellana Street, sa Brgy. Suba.

Giila ang biktima nga si Jefferson Leoligao, nagpuyo sa maong dapit.

Sa imbestigasyon sa Homicide Section sa Cebu City Police Office nga gipangulohan ni Senior Police Officer 2 Rommel Bancog ug mga kaubanan nasayran nga samtang nagdula og computer ang biktima kalit lang kini nga giduol sa batan-ong suspek ug gipusil kini sa iyang likod.

Sulay pa nga midagan ang biktima apan nahagba pipila ka metros gikan sa kompyuteran diin siya gipusil.

Human sa hitabo dali sab nga misibat ang 16 anyos samtang sulay pa unta nga gitabang sa mga sakop sa Cebu City Emergency Medical Services (CCEMS) ang biktima apan nakabsan gayod kini sa gininhawa.

Sa pagsubay sa kapulisan ilang nasayran nga adunay kuwarta nga gipatagoan ang suspetsado ngadto sa biktima apan sa dihang sulay na kini nga kuhaon sa suspetsado wala na kini nahatag.

Kini maoy nakitang hinungdan sa kapulisan nganong naglagot ang 16 anyos ngadto sa biktima.

Samtang pasado alas-12 sa udto, patay usab ang usa ka construction worker nga nag-sideline og paghabal-habal human kini gipusil sa ulo samtang naghatod og pasahero diha sa Nivel Hills, Brgy. Busay.

Ang biktima giila nga si Eduardo General, 36, taga Brgy. Sudlon II  samtang gitudlo nga gunman nagsakay og motorsiklo nga dali usab kaayong nisibat human sa pagpamusil.

Si Police Officer 2 Francel Buling sa Homicide Section nga nahinabi sa Banat News miingon nga human midawat og bayad sa iyang pasahero ang biktima usa ka motorsiklo ang kalit mihunong sa iyang likod ug ang backrider mipusil sa biktima sa ulo ug diha-diha nakabsan kini sa kinabuhi.

Si Buling mitug-an nga sa ilang pagsubay walay record sa Mabolo Police ang namatay.

Apan ilang nahibaw-an nga pipila ka adlaw na ang nakalabay nakakita og sukmagay ang biktima sa iyaha ra usab nga kaubang drayber sa habal-habal human sila nag-ilog og pasahero.  -/EIM (BANAT NEWS)