CEBU, Philippines – Gipahibawo ni Konsehal Arturo Bas sa Dakbayan sa Talisay nga sakmiton gyud sa kapolisan ang mga pabuto nga ipamaligya sa kadalanan sa siyudad kay wala silay gideklara nga designated area alang sa pagbaligya og mga pabuto.
Si Konsehal Bas nga maoy chairman sa Committee on Peace and Order nibutyag nga wala siya makadungog nga adunay nilukat og permits aron sila makabaligya og mga pabuto. Hinungdan nga istriktuhon kini nila og bantay aron malikay sa disgrasya ang katawhan.
Kahinumduman nga sa niaging katuigan, ni-ulbo ang mga pabuto nga gipamaligya ilawom sa flyover sa Brgy. Tabunok human naitsahan og upos nga sigarilyo gikan sa usa ka tawo nga niagi sa flyover.
Giawhag sa konsehal ang katawhan nga inay mogamit og pabuto, mogamit na lang og torotot o bisan unsa nga butang nga gamiton sa pagsaba-saba atol sa pagsugat sa Bag-ong Tuig. Iyang panghinaut nga unta mahimong malinawon ug hapsay ang pagsugat sa Bag-ong Tuig. - /DILT) (BANAT NEWS)