4 titser durugista
Usa sa gihimo na karon sa kapulisan sa siyudad mao ang pagpakatap sa mga unipormadong polis sa mga tunghaan ug ang paghimo og mga lectures aron mapasabot sa mga estudiyante ang dili maayong epekto sa drugas. AP/Matt Slocum, file
CEBU, Philippines - Upat ka mga magtutudlo dinhi sa probinsya sa Sugbo ang gi-monitor karon sa Cebu Provincial Police Office human gikatahong nalambigit sa ilegal nga drugas.
Kini ang gitug-an ni Sr. Supt. Eric Noble, director sa CPPO base sa mga intelligence reports ug human usab migawas ang impormasyon gikan sa Philippine Drug Enforcement Agency-7.
Hinuon wala mohatag og dugang impormasyon si Noble kung asa nga tunghaan nasakop ang upat ka mga magtutudlo ug kung manggamitay o namaligya ba sila og shabu.
Apan si Noble mibahad nga moabot ra gihapon ang panahon sa maong mga magtutudlo sa mosunod nga mga anti-illegal drugs operation sa kapulisan.
“Sige lang suyop lang, madakpan din namin kayo. Seryoso ‘yung kampanya laban sa ilegal na druga, kahit teacher ka man o kahit sino ka,” matud pa ni Noble.
Samtang ang director sa Cebu City Police Office, Sr. Supt. Joel Doria miingon nga hangtod karon padayon pa nila nga gisubay ang impormasyon nga gipagawas sa PDEA-7 kung asa kini nga tunghaan.
Usa sa gihimo na karon sa kapulisan sa siyudad mao ang pagpakatap sa mga unipormadong polis sa mga tunghaan ug ang paghimo og mga lectures aron mapasabot sa mga estudiyante ang dili maayong epekto sa drugas.
Target karon sa kapulisan sa CCPO nga kung mahimo tanan nga tunghaan ang mapaubos sa ilang plano karon nga programa sa labing dali nga panahon.
Samtang si Konsehal Dave Tumulak, Chairman sa Committee on Public Safety and Order ug Deputy Mayor for Police Matters sa iyang bahin miingon nga tinuod ang impormasyon sa PDEA-7.
Una niini, ang PDEA mibutyag nga walo ka mga public schools ang dunay mga estudyanteng drug pushers ug giingong namaligya usab niini sud mismo sa eskuylahan.
Matud ni Tumulak dugay na ang maong report ug gani sa miaging tuig nakadawat na siya og impormasyon mahitungod niini ilabi na sa high school. Si Tumulak miingon nga adunay mga tinun-an nga nakaestorya niya nga aduna gyuy mga tinun-an nga namaligya og drugas sa kaubang mga estudyante.
Si Dr. Bianito Dagatan, Cebu City Schools Division Superintendent miingon nga dili na nila huwaton ang validation sa PDEA tungod kay nagpatawag dayon kini og emergency meeting sa tanang night high schools sa siyudad.
Giuna niini ang night high school kay matod pa ang mga tinun-an nga naa sa night maoy risgo.
Gawas sa paghigpit sa seguridad sa mga tunghaan naglusad usab sila og mga nagkalain-laing kalihukan sama sa pag-institutionalize og balik sa ‘Barkada-Kontra Droga’ aron malikay ang ilang mga estudiyante nga malambigit niining dautang bisyo. (BANAT NEWS)
- Latest
