Bugnaw nga pasko masinati gumikan sa hanging amihan

CEBU, Philippines - Karon nga nagkaduol na ang panahon sa pasko, ang Philippine Atmospheric Geophysical and Astronomical Services Administration nibana-bana na nga mas mobugnaw ang temperatura tungod sa paghinay-hinay nga pag-abot sa hanging Amihan.

Ang pag-abot sa hanging Amihan magdala og bugnaw nga hangin sa kabaybayonan karong Disyembre hangtod sa buwan sa Pebrero sunod tuig.

Niadtong Nobiyembre 1, ang PAGASA nakaobserbar og kusog-kusog nga northeasterly winds sa habagatang bahin sa nasud ug kini gilauman nga mas mokusog ug modominar sa tibuok Pilipinas nga magdala og mabugnaw nga hangin.

Si Engr. Alfredo Quiblat, Jr., OIC sa PAGASA-Cebu nipasabot nga moabot kini sa kinatas-ang gikusgon sa Disyembre diin maghinayhinay og dominar ang northeasterly winds nga magdala og “pasko nga hangin”.

Sa pagkakaron, ang naobserbaran nga nagpadayon nga hangin mao ang “east to northeast” ug hangtod nga mohinayhinay kini og balhin sa “northeast” o amihan. Dugang ni Quiblat nga magpaabot sila sa updated nga issuances gikan sa PAGASA head office. Iyang gipasabot nga usa sa epekto sa pag-abot sa hanging amihan mao ang pagbugnaw sa air temperature kay ang hangin nga gidala niini naggikan sa Siberia o mainland China. (BANAT NEWS)