Davide gustong may rehab center sa Cebu
CEBU, Philippines - Hangyuon ni Gobernador Hilario Davide III si Department of Health Secretary Paulyn Jean Rosell-Ubial nga iapil ang Sugbo sa tukuran og rehabilitation center alang sa mga nalambigit sa ilegal nga drugas.
Kini human nga si Ubial nagkanayon nga maggahin ang DOH og P3 bilyones sunod tuig alang sa rehabilitation ug treatment sa mga tiggamitan og ilegal nga drugas.
Tukuron ang rehabilitation centers sa Autonomous Region in Muslim Mindanao (ARMM), Region 12, MIMAROPA (Mindoro, Marinduque, Romblon, Palawan), Cordillera Administrative Region (CAR) ug Negros Island Region (NIR).
Samtang ang treatment facility tukuron sa Nueva Ecija ug Bataan sa Luzon, Capiz ug Carmen, Bohol sa Visayas ug Saranggani sa Mindanao.
"Maayo unta maapil ang province ana... I'd like unta nga naa sa province kay mas daghan man kaayo gani sa news karon kabasa ko katong mga nangamatay nga dagku kaayo nga big time mga taga Cebu, Sabalones, Jaguar, Yawa, Barok, naa kining si Kerwin nga taga Hipodromo man diay. So I hope nga ma-reconsider," matud ni Davide.
Hinoon si Davide nakasabot nga posible nga ang gipili nga mga lugar mga "ideal form" nga matukuran sa rehabilitation center, apan matud sa gobernador nga mosuwat siya ug maghuwat kung unsay tubag sa DOH. (BANAT NEWS)
- Latest
