CEBU, Philippines - Away pinaagi sa text maoy hinungdan nga nagpusil ang usa ka babaye sa iyang kaugalingon sulod sa iyang giabangang lawak sa Sitio Kasagingan, Lawaan III, Dakbayan sa Talisay kagahapon sa buntag.
Samdan sa ibabaw nga bahin sa iyang wala nga dughan si Jenny Bantillo, 29-anyos, minyo nga nagpuyo sa nahisgutang lugar.
Nag-inusara si Bantillo sa iyang lawak dihang nakadungog og sipa nga buto sa armas ang mga silingan.
Sa ilang pagsusi nagbuy-od na sa iyang kaugalingong dugo ang biktima hinungdan nga dali kini nga gidala sa Talisay City Hospital ug gibalhin sa tambalanan sa Siyudad sa Sugbo.
Nasayran sa mga awtoridad nga adunay gipamati nga epilepsy si Bantillo apan ila sab nasuta nga nag-away siya sa iyang bayaw pinaagi sa text sa wala pa kini nagpusil sa iyang kaugalingon.
Sa pagsuwat niining balita buhi ang biktima apan nagpabilin pa nga nagpaalim sa iyang samad pinusilan sa tambalanan. (BANAT NEWS)