OFW biktima sa ATM Scam

CEBU, Philippines - Bag-ong biktima sa automated teller machine (ATM) scam ang usa ka overseas Filipino worker balor og kapin P200 mil.

Si Eniel Ybanez, 47, usa ka construction worker nga taga Lutopan, Toledo City, ang ika-19 nga biktima sa ATM scam kinsa guol kaayo sa ka daku nga kwarta nga nakuha gikan sa iyang account niadtong Sabado, Nobiyembre 19.

Nadiskubrehan ang pagkahanaw sa kwarta dihang siya nag- withdraw og P4,000 sa Bank of the Philippine Islands nga ATM booth ug nakita nga gamay na lang ang balance sa iyang account.

Gibutyag ni Ybañez nga ni-withdraw siya niadtong Nobiyembre 11 diin ang balance anaa pa sa P283,163 apan sa niaging  Sabado, P78,976 na lang ang pundo.

Daling nidangop si Ybañez sa Philippine National Bank (PNB) sa Tabunok, Talisay City aron pahibaw-on sa nahitabo ug sa walay langan iyang gihurot pagkuha ang nahabiling pundo.

Nagpatabang kagahapon si Ybañez kang Konsehal Dave Tumulak sa Dakbayan sa Sugbo aron sab masulbad ang iyang problema nga susama sab ang nasinati sa konsehal.

Apan matud ni Tumulak nga hangtud karon wala pa silay update tungod kay ang mga bangko nagdumili pa sa paghatag og hulagway ug video sa mga ni-withdraw sa ATM machines.

Nabalaka si Tumulak sa daku niini nga epekto sa ekonomiya sa siyudad ilabi na sa banking industry tungod kay makuyawan na ang mga depositors.

Sunod semana adunay legal nga aksyon nga buhaton si Tumulak pinaagi sa pagsuwat ngadto sa Bangko Sentral ng Pilipinas ug kang Presidente Rodrigo Duterte labot sa maong mga panghitabo sa Sugbo.

Samtang si Mayor Tomas Osmeña naalarma na sab sa mga nahitabo sa Siyudad sa Sugbo.  (BANAT NEWS)