Larvicide nalangan, dengue nidaghan
CEBU, Philippines - Nisaka ang kaso sa dengue sa Probinsiya sa Sugbo ug posibleng ang hinungdan niini mao ang pagkalangan sa larvicided matud sa chairman sa committee on health sa hunta probinsiyal, Bokal Christopher Baricuatro.
Niadtong Nobiyembre 11, ang Provincial Health Office nipahigayon og massive clean-up drive batok dengue sa kalungsuran.
Base sa report sa PHO nga gikan sa 5,821 ka kaso sa dengue diin 53 niini ang napatay gikan sa Enero 1, 2016 hangtud sa Oktubre 8, nisaka pa gyud kini karon sa 8,969 ka kaso ilabi na sa lima ka component cities ug tulo ka lungsod nga mao karon ang gimonitor sa Disease Reporting Units (DRU) sa PHO.
Ang Dakbayan sa Toledo maoy nag-una diin dunay 676 ka kaso; Dakbayan sa Carcar adunay 577; Dakbayan sa Talisay adunay 441; Dakbayan sa Naga adunay 280 ka kaso.
Ang Lungsod sa Balamban adunay 554; sa Consolacion, 427 ug Liloan, 423.
Matud ni Baricuatro nga niadtong Huwebes pa naabot ang mga larvicide nga gipalit sa probinsiya tungod sa ka taas sa proseso.
Karong semanaha ipangapud-apod ang mga larvicide ug nanghinaut si Baricuatro nga mokunhod na ang kaso sa dengue sa probinsiya. (BANAT NEWS)
- Latest
