CEBU, Philippines - Gitin-aw ni Cebu City Mayor Tomas Osmeña nga nangita sila og lugar sa bukirang mga barangay sa dakbayan alang sa tinguha nga pagtukod og bag-ong jail facility.
Kahinumduman nga gisaway ni Konsehal Joel Garganera ang plano sa mayor nga ibutang niini ang bag-ong prisohan sa Inayawan Landfill kun sirad-an na kay matud sa konsehal, dili haom ang maong lugar.
Gitataw ni Mayor Osmeña nga gawas sa landfill nangita usab siya og lugar sa bukirang mga barangay alang sa maong katuyuan apan wala pa sila’y nakita nga dapit.
Gipasabot sa mayor kun nganong wala pa sila’y napilian nga lugar kay kun unsay anaa sa mga bukirang barangay modagayday man kini sa Cebu City proper. Dili sab sayon ang pagsaka og bukid ilabi na sa mga truck nga adunay bug-at nga karga.
Hinoon gitataw ni Osmeña nga aduna siya’y lugar nga nakit-an alang sa maong plano nga iyang gihulagway nga haom gyud nga tukuran og jail facility. Kini nahimutang sa boundary sa Brgy. Kalunasan ug Busay.
Gihulagway sa mayor nga sayon ra’ng i-develop ang lugar dungan sa pagbutyag nga daghan og kaayuhan nga makuha sa maong dapit sama sa livelihood ug uban pa. (BANAT NEWS)