CEBU, Philippines - Gisakmit ang kinilong atay sa baboy ug ulo sa manok nga dili na mahimong kan-on sa mga tawo apan gibaligya sa Carbon Public Market kagahapon sa kadlawon sa mga tinugyanan sa Department of Veterinary Medicine and Fisheries.
Ang upat ka kilong atay sa baboy ug siyam ka kilong mga ulo sa manok ang gisakmit tungod kay lain na og baho. Matud ni Dr. Alice Utlang nga gilubong na lang nila ang mga nasakmit tungod kay sobra na sa ka baho ug dili na gani mahimong ipakaon sa kahayupan.
Sumala pa ni Utlang nga subsob ang ilang kampanya sa pagsusi sa mga itinda sa mga merkado aron pagseguro nga presko ang makaon sa mga mamalitay ilabi na sa kabataan.
Dugang ni Utlang nga karong Biyernes iyang ipatawag ang tanang manindahay og karne sa Carbon aron tukion ang kanunay na lang mga kalapasan nga mahimo tungod kay ila na gyud pasakaan og kaso.
Samtang magtigum karong adlawa ang mga sakop sa Provincial Veterinary Office ug mga meat inspectors sa tibuok Lalawigan sa Sugbo aron hisgutan ang nagkadaiyang isyu sa pagbaligya sa karne alang sa umaabot nga Pasko.
Matud ni Dr. Mary Rose Vincoy, pangulo sa PVO, nga gawas nga ipaubos sa seminar ang mga meat inspectors sulod sa tulo ka adlaw alang sa proper hygiene ug maayong paagi sa pag-ihaw og hayop o karne.
Apil sa hisgutan ang gikatakdang pagsusi sa mga ihawan ug baligyaanan og karne sa lalawigan.
Sumala pa ni Vincoy nga 75 porsiyento sa mga meat inspectors sa Sugbo ang napaubos og training diin sila gitudloan kung unsaon pag-ila kung nag-agi ba og sakit ang usa ka hayop, pwede ba kining kan-on, double dead meat o kung angay ba nga ihawon.
Ang mga meat inspectors mosuroy sa mga ihawanan sa pagsusi sa mga karne ug kung maihaw na, adto na usab kini susihon sa mga merkado.
Ang masakpan nga magbaligya og mga daut na nga karne ipa-blotter sa kapolisan.
Ang karne sakmiton ug kung mahimo pa nga kan-on ihatag kini ngadto sa mga charitable institutions apan kung dili na, sunugon kini.
Lakip nga giseguro nga maayo ang ibaligya nga karne sa merkado mao ang pag-require sa mga ihawan og lisensya sa pag-operate.
Sa tibuok lalawigan, matud ni Vincoy nga adunay 27 ka slaughter houses lakip na niini ang Dakbayan sa Sugbo ug sa Dakbayan sa Lapu-Lapu. (BANAT NEWS)