CEBU, Philippines - Nihagit ang Department of Social Welfare and Development sa tanang local government units nga istriktuhon ang pagpatuman sa anti-mendicancy ordinance nunot sa pagsaka sa gidaghanon sa mga street dwellers.
Matud ni Anthony Arsenal, planning officer III sa DSWD-7, aduna silay gipahigayon nga comprehensive program for family at risk sukad niadtong tuig 2015 hangtud karon diin aduna silay ayuda nga gihatag sama sa financial ug skills training.
Kini ang hinungdan nga ilang pangumustahon karon ug buhatan og evaluation kung unsay resulta sa maong programa ilabi na nga nagkadaghan karon ang mga kabataan ug pamilya nga makit-an sa kadalanan.
Sumala pa ni Arsenal nga ilang sutaon kung unsay mga rason ug kakulangan sa ilang gihimo nga programa diin ang mga tawo nga naa sa kadalanan adunay ilang kaugalingon nga panimalay apan ganahan lang gyud nga magpuyo sa kadalanan tungod sa presensiya sa mga tawo nga kusog manghatag sa mga makililimos.
Si Arsenal niawhag sa mga LGUs nga hugtan ang anti-mendicancy ordinance aron makat-on na sa pagpamauli sa ilang mga panimalay ang mga tawo nga nabuhi sa pagpakilimos sa kadalanan.
Gitug-an ni Arsenal nga makig-alayon sila karon sa tanang LGUs ug stakeholders alang sa panaghugpong sa pagtubag sa maong problema diin nagkinahanglan kini og panaghiusa ilabi na nga hapit na ang Pasko.
Samtang sa laing bahin, 51 ka street children ang na-rescue sa ikaupat nga higayon sa Operation Gugma sa Women and Children’s Protection Desk sa Cebu City Police Office uban sa pagpakig-alayon sa Cebu City Commission for Street Children ug Department of Social Welfare and Services niadtong Huwebes sa gabii.
Matud ni Senior Inspector Shiela Gurtiza, pangulo sa WCPD, ang Operation Gugma mao ang subject sa case conference sa kabataan kansang ginikanan motugot kanila nga maglaroy-laroy sa kadalanan human sila mopirma og oath of undertaking.
Dugang ni Gurtiza nga ang mga ginikanan nga nitugot sa ilang kabataan nga magpakilimos ikiha tungod sa paglapas sa Republic Act No. 7610.
Ang kabataan nga na-rescue gipakaon ug gikuhaan og profile sa Community Scout Youth Guidance Center. (BANAT NEWS)