Talisay-Minglanilla trapik grabe na

CEBU, Philippines - Daghan na sab nga motorista nga mag-agian sa Dakbayan sa Talisay ug Lungsod sa Minglanilla ang nagbagulbol tungod sa grabeng trapik.

Pipila kanila nipadayag pinaagi sa Facebook sa ilang kasagmuyo sa mga opisyal sa dakbayan ug lungsod tungod sa ka trapik na sa ilang lugar.

Si Concordio Mejias, municipal administrator sa Minglanilla, nibutyag nga ang ka trapik nga masinati diha gyud magsugod sa Lipata, Barangay Linao tungod sa nagpadayon nga pag-ayo sa kanal nga proyekto sa Department of Public Works and Highways.

Siya nagkanayon nga niabot na kini og duha ka buwan ang maong proyekto apan hangtud karon wala pa gyud mahuman. Siya mismo nakasinati sab sa trapik.

Samtang si Chief Insp. Florendo Fajardo, hepe sa kapolisan sa Lungsod sa Minglanilla, niingon nga mokanit-kanit gyud ang trapik gikan sa lungsod hangtud sa Dakbayan sa Talisay ilabi na sa oras nga tinggawas sa mga tinun-an ug trabahante.

Iyang gibutyag nga kung aduna siyay kahigayonan iyang hangyuon ang mayor nga unta makaapil siya sa Municipal Peace and Order Council aron iya sab mahangyo ang kontraktor sa maong proyekto nga sa gabii sila motrabaho sa ilang proyekto aron dili maapektuhan ang karsada sa pagkabuntag diin daghan nga mga sakyanan ang manggawas. (BANAT NEWS)