P120 mil gikawat sulod sa korte

CEBU, Philippines - Palawman sa mga sakop sa Theft and Robbery section sa kapolisan sa  Dakbayan sa Bogo ang ilang imbestigasyon sa nahitabong pagpanglungkab sa buhatan ni RTC Branch 61 Judge Antonio Maringomen diin nasakiyo ang kwarta nga nagkantidad og P120 mil.

Nasayran nga mismo si Judge Marigomen nga taga Barangay Dakit, Bogo City maoy unang naka-diskubre sa hitabo pasado alas 7 sa buntag sa nakalabay nga adlaw.

Sumala pa ni PO3 Ryan Alarde, imbestigador sa Bogo City Police nga sa ilang gihimo nga imbestigasyon nasuta nga walay CCTV ug guwardiya ang maong korte.

Nahibaw-an sab ni Alarde nga personal nga kwarta ni Marigomen ang nawala nga didto gibutang sa drawer sa iyang buhatan.

Matud sa polis nga wala gipugos og abri ang pultahan sa maong buhatan ug bugtong ang lock lang sa drawer ang giguba.

Gitug-an sab niya nga aduna’y tulo ka duplicate sa yawe sa “main door” sa maong korte ug tulo sab ka tawo ang naghawid niini.

Sa pagkakaron nagpadayon ang gihimo nila nga imbestigasyon sa maong hitabo.

Dugang ni PO3 Alarde nga ang maong pagpanglungkab maoy labing una nga nahitabo sa maong buhatan.

Gihangyo na sa kapolisan ang mga opisyal sa Brgy. Dakit nga butangan og barangay tanod ang korte matag gabii aron dili na masubli ang pagpanglungkab. (BANAT NEWS)