Nakit-an apan guba na

CEBU, Philippines - Nakit-an na sa General Services Office (GSO) ang ladder fire truck ug water tanker nga gipangita ni Cebu City Vice Mayor Edgardo Labella, apan ang maong mga ekipo anaa sa junkyard sa siyudad tungod kay dili na kini magamit kay guba na.

Kahinumduman nga si Vice Mayor Labella nipadala og suwat sa pangulo sa GSO nga si Ronald Malacora ug gipangita kun hain na ang ladder fire truck ug water tanker nga gikan sa laing nasud ug gi-donate sa siyudad niadtong tuig 2000.

Human madawat ang suwat, gipasusi dayon ni Malacora ang record sa ilang property division diin walay nakitang record apan adunay nitakdo sa serial number ug ila kining gisubay kun kini maoy gipangita sa bise mayor.

Gibutyag ni Malacora nga ilang nasubay kun hain ang maong mga ekipo ug anaa kini karon sa junkyard sa siyudad kay naapil man kini sa mga gikonsiderar nga angay nang i-dispose kay guba na.

Hinoon iya kining ipasusi kun maayo pa ba kini.

Nasayran nga susihon sa GSO ang Property Return Slip aron mahibaw-an kun unsang tuiga gibutang sa junkyard ang maong ladder fire truck ug water tanker. Nagpadala na usab kini og tubag kang Labella niadtong niaging semana aron pagpahibawo nga nakit-an na ang mga gipangita niini ug naa kini sa compound kay apil kini sa mga disposal units sa siyudad.