CEBU, Philippines - Bakante na ang posisyon nga deputy officer sa City of Talisay-Traffic Operation Development Authority (CT-TODA).
Gikompirmar ni Mayor Eduardo Gullas nga ang kanhi deputy officer sa CT-TODA nga si Almond Dela Peña gibalik sa iyang karaang assignment sa Engineering Office.
Sa wala pa kini nahitabo, gihusay sa mayor sila si Dela Peña ug si retired general Hiram Benatiro kun si kinsa ang modumala sa maong buhatan.
Gipili ni Mayor Gullas si Benatiro nga maoy labaw sa CT-TODA ug si Dela Peña maoy iyang luyo-luyo. Apan nilabay ang usa ka adlaw, nipagawas sa iyang kasagmuyo si Dela Peña sa buhatan ni Benatiro ug nilabay pa sa iyang cellphone sa gawas sa opisina sa iyang labaw.
Dugang ni Gullas nga iyang gisalig ang CT-TODA ngadto kang Benatiro kay nakaila siya dihang kini nagserbisyo pagkapolis.
Si Bise Mayor Alan Bucao nipadayag sa iyang suporta kang Benatiro ug nanghinaut nga matarong niini ang dagan sa trapiko sa Talisay.