CEBU, Philippines - “Katawhan gitawag sa pagkabalaan.”
Kini maoy tipik sa wali ni Auxiliary Bishop Oscar Florencio sa Archdiocese of Cebu atol sa Santos nga Misa nga gipahigayon sa Sto. Rosario-Carreta sa Adlaw sa mga Santos.
Matud ni Florencio nga kagahapon mao ang solemnity sa tanang mga Santos ug kinahanglang hatagan og dakung bili ang Ginoo sanglit kini maoy naghatag og gasa sa pagkabalaan.
Sumala pa ni Florencio nga ang Adlaw sa mga Santos pagpasidungog sa kadaugan sa Dios tungod kay walay Dios, walay pagkabalaan.
Matud ni Florencio nga ang katawhan gitawag sa pagkabalaan sa kinabuhi karon dayon ug dili sa sunod tuig kay dili mahibaw-an ang mga panghitabo ug ang pagpuyo sa pagkabalaan dili lang kutob sa pag-ampo, pagsimba ug pagduaw sa sementeryo kung dili lakip usab ang pagpakita og maayong mga binuhatan ngadto sa isig ka-ingon ilabi na sa nanginahanglan.
Kini tungod kay sa katapusan ang Ginoo dili mohusga sa tawo tungod sa iyang mga naabot ug bahandi kung dili sa iyang gugma nga gipatagamtam ilabi na sa mga nanginahanglan
Si Fr. Mhar Vincent Balili, kura paruko sa Archdiocesan Shrine of San Roque, atol sa iyang Santos nga Misa sa Calamba cemetery nipahinumdum sa katawhan nga ang Adlaw sa mga Santos pagpahinumdum sa mga Santos nga naa sa langit nga gideklarar ug wala nadeklarar sa Simbahan.
Dugang ni Balili nga ang pagka-Santos tawag sa tanang tawo hinungdan nga awhag niya sa katawhan nga putlon ang pagtuo-tuo tungod kay mawala ang pagtuo ngadto sa Ginoo.