“Pusher” ug chief tanod napatay sa mga polis

CEBU, Philippines - Patay ang usa ka giingong notadong drug personality nga nagagikan sa Masbate ug ang hepe sa mga tanod sa usa ka barangay sa lungsod sa Samboan human giingong nakigpinusilay sa mga sakop sa Provincial Intelligence Branch (PIB) ug Samboan Police atol sa gihimo nga buy-bust operation diha sa Sitio Kinabonbonan, Brgy. Tangbo sa Lungsod sa Samboan pasado alas 8 niadtong nakalabay nga buntag.

Ang duha ka suspetsado nga napatay giila nga si Romulo Lopez, taga Masbate ug Anthony Tancio, chief tanod sa maong barangay.

Matud pa sa hepe sa Samboan Police, Sr. Insp. Armando Labora nga nahinabi sa Banat News duha ka bulan pa lang nga naabot sa ilang lungsod si Lopez ug namaligya kini og panapton.

Apan nasayran ni Labora nga plantalya lang diay kini ni Lopez kay shabu diay ang tinuoray niini nga negosyo. Atol sa buy-bust operation nakamatikod ang duha nga mga polis ang ilang katransaksyon hinungdan nga mibunot sa armas ug nahitabo ang pinusilay. Sulay pa unta nga gidala sa Oslob District Hospital ang duha apan namatay gyud ang duha ug nakuha kanila ang usa ka .22 revolver ug usa ka .357 revolver.

Lakip sa nakuha ang balor P271, 400 nga shabu ug sakyanan nga Nissan Sentra. Matud pang Labora, base sa impormasyong ilang nakuha gikan sa Masbate, napatay sa kapolisan ang igsuon ni Lopez didto sa Masbate atol sa anti-illegal drugs operation ug si Lopez nakaikyas ug padayon nilang gipangita.

Makadaghan na sab gireklamo sa mga silingan si Lopez kay magsige og pasalba sa armas ug manghulga sa mga tawo nga sila patyon kung motug-an sa mga polis.

“Naabot daw ni diri sa Samboan pump boat ra daw ang gisakyan, unya nagpaila nga gahi dayon sa lugar, murag gusto modominar sa lugar maong nangreklamo ang mga tawo kay abusado daw kaayo,” matud pa ni Labora.

Nagtuo sab si Labora nga nagplano sab si Lopez nga magtukod og grupo sa mga armado sa ilang dapit human ilang nasayran nga duna’y pipila na sab diay ang gipanguha ni Lopez nga masakop sa ilang grupo.

Si Labora midugang nga kining hepe sa mga tanod base sa ilang report tiggamitan usab kini og illegal nga drugas ug kasinabot kaayo sa suspek nga si Lopez.