Mga na-rescue sa Bohol tabangan sa PCWC sa Sugbo
CEBU, Philippines - Makig-alayon ang Provincial Commission for the Welfare of Children sa Sugbo sa Department of Social Welfare and Development sa Probinsiya sa Bohol kabahin sa na-rescue nga mga batan-on kinsa uban kanila mga Sugboanon.
Si Heda Largo, executive officer sa PCWC, nagkanayon nga buot nilang masuta kung pila kabuok ang taga Probinsiya sa Sugbo sa mga na-rescue ug kung unsa nga tabang ang ilang maayuda.
Ang National Bureau of Investigation (NBI) sa Bohol ug DSWD ang nipahigayon og pagpangronda sa usa ka giingong illegal orphanage sa Dakbayan sa Tagbilaran diin 38 ang na-rescue ug 31 niini mga minor de edad.
Sa listahan sa DSWD-7, sa maong gidaghanon 27 ang gikan sa Sugbo, tulo kanila ang naa na sa saktong pangedaron ug 23 mga minor de edad ug usa ang babaye.
Si Largo nagkanayon nga ang mga susamang orphanage ang kinahanglang ma-monitor sa gobiyerno kung unsa ang ilang kalihukan.
Ang PCWC sa Sugbo adunay gi-monitor nga center nga giingong dunay mga reklamo batok niini. (BANAT NEWS)
- Latest
