K9 units gitugyan sa kapitolyo ngadto sa PDEA

CEBU, Philippines - Tulo ka K9 nga Belgian Malinois ug black Labrador ang gitugyan sa Kapitolyo ngadto sa Philippine Drug Enforcement Agency (PDEA) kagahapon sa buntag.

Ang maong mga iro, gibansay kabahin sa pagsimhot og mga kontrabando sama sa ilegal nga drugas ug eksplosibo. Sila ang mobantay sa Cebu South Bus Terminal ug sa Cebu Provincial Detention and Rehabilitation Center.

Ang hepe sa PDEA nga si Yogi Felimon Ruiz nipasabot nga ang maong mga iro gigamit sa PDEA kaniadto isip volunteer.

Karon gi-accredit na nila ubos sa kagamhanan sa probinsiya sa Sugbo nga maoy mohatag og pinansiyal nga suporta aron magamit sa mga nahisgutang pasilidad.

Nunot niini, ang hepe sa Cebu Provincial Anti-Drug Abuse Office nga si Carmen Remedios Durano-Meca nibutyag nga ang maintenance sa mga iro abagahon sa probinsiya ug ang tulo ka handler nila ikonsidera usab nga mga kawani sa Kapitolyo ubos sa plantilla position sa Civil Security Unit. Diin matag buwan maabot sa P33 mil ang magasto sa maintenance nila.

Si Ruiz nagkanayon nga sugod niining semanaha ipang-deploy na sila full time ug rotational ang pag-deploy kanila diin i-deploy sila sulod sa duha ka adlaw ug usa ka adlaw ang off aron dili sila ma-fatigue.

Dugang ni Ruiz nga ang K9 maoy dali nga pamaagi sa pagsakop sa pag-smuggle sa mga ginadiling drugas. (BANAT NEWS)