Loot dili masurprisa kun Espinosa manudlo na sab og police protector

CEBU, Philippines - Bisan og nalakip sa listahan isip drug protector ni Presidente Rodrigo Duterte si Daanbantayan Mayor Vicente Loot, padayon siya sa iyang hugtanong kampaniya batok sa ilegal nga drugas.

Matud ni Mayor Loot nga nigahin siya og budget alang sa peace and order sa ilang lungsod apan ang gisugyot niya nga P3 milyones gilaslasan kini ngadto sa P200 mil. Hinungdan nga iyang gihulagway nga ang milaslas sa budget posibleng dili gusto mahunong ang krimen sa ilang lungsod.

Dugang niya nga ang iyang gisaad nga cash incentive lakip unta sa gisugyot niya nga budget apan daku kaayo ang laslas.

Sayo pa, ang mayor mitanyag og P50 mil nga premyo alang sa ma-neutralize nga drug pusher ug P10 mil sa mga pusher nga masikop ug mapriso.

Nunot niini, bisan og gitangtangan sa iyang deputation power, matud ni Loot nga padayon gihapon ang iyang hugtanong kampaniya batok sa kriminalidad sa lungsod. Butyag niya nga wala siya magkinahanglan og deputation power kay isip mayor iyang obligasyon ang paghatag og suporta batok sa kriminalidad.

Ang Daanbantayn adunay 996 ka drug surrenderer diin ubay-ubay kanila ang nangapriso na.

Alang usab sa pagmentenar sa kahusay ug kalinaw gitugyan niya kini ngadto sa kapolisan ang pagpaubos sa training sa 50 ka Barangay Peacekeeping Action Team (BPATs). Ang budget sa training sa mga BPAT gikan sa lokal nga kagamhanan sa lungsod.

Gipasabot niya nga ang mga BPAT maoy magpahigaon og visibility sa kabarangayan ug sa maong sitwasyon dili na maglisod sa intervention ang kapolisan.

Sa laing bahin, sa pagkasikop sa big time drug pusher nga si Kerwin Espinosa si Loot nagkanayon nga mahatagan na og hustisya ang mga biktima niini. Dili sab siya masurprisa kun si Espinosa manudlo na usab kini og mga polis nga giingong nagprotekta kaniya kay kaniadto pa nga nagpataka og panudlo si Espinosa diin ang tanang polis nga nalambigit sa pagsikop kaniya giapil niini og tudlo. Dugang ni Loot nga unta wala nay laing hinganlan nga nalambigit sa ginadiling drugas kay sama kanilang nahinganlan masakitan usab kini ug adunay mga pamilya ug reputasyon nga giampingan. (BANAT NEWS)