P6M shabu, sakop ni Kerwin sikop

CEBU, Philippines - Dul-an P6 Milyones nga kantidad sa gituohang shabu ug upat ka tawo ang nadakpan nga naglakip sa giingong sakop ni Rolando “Kerwin” Espinosa sa managlahi apan konektadong anti-illegal drugs operation sa Pardo Police Station ug City Intelligence Branch sa Cebu City Police Office.

Si Senior Insp. Robert Lucernas hepe sa Pardo Police Station nga nahinabi sa Banat News nagkanayon nga una nga nadakpan sa checkpoint diha sa Highway  N. Bacalso Ave., Sitio Saryo, Bulacao, Cebu City niadtong nakalabay nga kaadlawon ang usa ka Mark Anthony Abay, 37 anyos nga taga Dakbayan sa Talisay.

Nitug-an

Si Abay gidakop sa dihang sulay nga mibalik sa  iyang agi pinaagi sa pagkanaog sa motorsiklo ug mikaratil og dagan pagkakita nga dunay nag-checkpoint sa unahan, apan nabantayan kini ug gigukod hangtud nga nadakpan.

Narekober sa mga polis gikan ni Abay ang gituohang shabu nga kantidad og P30 mil ug ang selpon niini nga gigamit sa iyang transaksyon sa kontak sa pagkuha niya og shabu.

Matud pa ni Lucernas nga atol sa ilang interogasyon sa suspetsado kini mitug-an nga gikan sa usa ka alyas Titing ang shabu nga iyang gikuha ug nakompirmar nila kini base sa mga text messages sa selpon sa suspetsado.

Human nakahatag og sketch sa lugar, giteksan sa mga polis si alyas Titing gamit ang selpon ni Abay ug mi-order sila og shabu kantidad og P15 mil ug mag-abot sa usa ka lugar.

Ex-PDEA agent

Didto sab nasayran ni Lucernas nga si alyas Titing mao diay ang number 1 drug personality nga anaa sa ilang watchlist nga si Moises Arriesgado nga kanhi ahente sa Philippine Drug Enforcement Agency-7.

Sa dihang misanong kini sa sabot ilaha kini nga nasignit diha sa Sitio Cabancalan 1 Brgy Bulacao ug nakuhaan og P20 mil nga kantidad sa shabu.

Gitug-an ni Lucernas nga nadestino si Arriesgado sa PDEA-7  ug gilabay sa Mindanao apan nag-AWOL (absent without leave). Sa pagpangutana sa mga polis ni Arriesgado kini mitug-an nga gikan sa Brgy. Labangon ang supply niini sa shabu.

Sakop ni Kerwin

Tungod niini nagpatabang sila sa City Intelligence Branch ug  gihimo dayon ang operasyon batok sa supplier ni Arriesgado.

Atol sa pagpangronda nadakpan sa mga operatiba ang magtiayon nga sila si Jesryl Bacalla,43, ug ang iyang asawa nga si Jean Bacalla, 46, nga brgy. kagawad sa Brgy. Poblacion 3, Baybay, Leyte.

Si Lucernas miingon mitug-an sila nga gikan sa grupo ni Kerwin Espinosa ang supply nila sa shabu.

Nakuha sa kapolisan gikan kanila ang usa ka extra-large pack, unom ka dagko, 10 ka medium ug siyam ka gagmay sa putos sa gituohang shabu nga motimbang og 500.5 gramos nga dul-an P6 Milyones ang kantidad base sa Dangerous Drug Board value, lakip sa nasakmit ang mga  packing ug drug paraphernalia.

Dakong grupo

Ang director sa Cebu City Police Office nga si Sr. Supt. Joel Doria miingon nga human sa ilang pakig-alayon sa kapulisan sa Leyte ilang nasayran nga ang magtiayon gipanid-an usab didto ug mga target usab sila sa kapulisan sa maong dapit.

Si Doria miingon nga usa ka bulan nang nagpuyo dinhi sa dakbayan ang magtiayon tungod kay taga diri ang Bacalla.

Alang ni Doria nga daku nga grupo ang nakuha nila karon gumikan sa kadaku sa koneksyon ug kadaghan sa drugas nga nakuha.

Gitug-an sab ni Doria nga duna silay video nga nagpakita nga ang magtiayon nakita nga naggamit og shabu.

Pangbisyo ra

Apan si Jesryl nihimakak sa pasangil nga sakop siya sa grupo ni Espinosa kay matud pa niini ginagmay ra ang iyang negosyo para masustiner ang iyang bisyo.

Samtang ang iyang asawa nihimakak nga kakunsabo sila sa iyang bana sa negosyo niini sa illegal drugs kay bag-o ra siya naabot sa Sugbo     aron mobisita sa iyang bana.

Apan si Police Officer 3 Richard Macahig, desk officer sa Baybay City Police Station nitug-an sa Banat  News nga nalakip sa ilang high value target si Bacalla ug Numero 1 kini sa ilang Top 10 Drug Personality sa ilang siyudad. Apil unta sa ilang Oplan Tukhang si Bacalla apan nibalhin kini og pinuy-anan.

Nakugang

Si Kapitan Maria Jane Fulgar, sa Zone 3 Barangay Poblacion, sa Baybay nakurat sa pagkasikop sa iyang kagawad apan nitug-an nga wala na kini tambong-tambong sa ilang mga   sesyon sukad gisugdan ang Oplan Tukhang sa kapulisan duha ka bulan na ang nakalabay  tungod kay magsige kini og biyahe kuyog sa iyang bana padulong dinhi sa Sugbo.

Si Leila Albiar, tigpamaba sa PDEA-7 mikompirmar nga kanhi ahente sa PDEA-7 si Arriesgado nga nabalhin kaniadto sa Mindanao ug nag-AWOL hinungdan sa pagkataktak niini sa ilang ahensya. Jojo Ugdol ug Rowena D. Capistrano (BANAT NEWS)