CEBU, Philippines - Ang City Ordinance 14-2016-1220 nga nagpausbaw sa kalapasan sa lagda sa trapiko, hingpit nga gipatuman sa Dakbayan sa Mandaue nunot sa pagpatuman sa “No Stopping” sa tanang matang sa sakyanan ug “Anti-Jaywalking” sa U.N. Avenue nga manukad sa eskina M.C. Briones paingon sa eskina sa dalan Plaridel.
Gipahibalo ni Mayor Luigi Quisumbing nga duha lang ka loading ug unloading ang ibutang sa maong dalan alang sa mga bus ug PUJ. Gidili usab ang pagpataka og labang sa maong dalan gawas lamang sa mga gitugot nga lugar aron malikayan ang disgrasya.
Si Quisumbing nipasabot nga ang maong pamaagi maoy sulbad sa masinati nga paghuot sa trapiko nga makalangan sa biyahe paingon sa Dakbayan sa Sugbo, Lapu-Lapu ug ubang dapit sa amihanan. Dugang sa mayor nga ang mga drayber nga dili mohunong sa designated areas o dili mogamit sa junction box, makamulta og usa ka libo ka pesos samtang ang magpataka og labang, makabayad og P50.
Ang operation officer sa Traffic Enforcement Agency of Mandaue (TEAM) nga si Glenn Antigua niingon nga ang loading ug unloading area anaa nahimutang sa kilid sa Pacific Mall kay sa terminal sa maong mall, makasakay ra usab ang mga pasahero. Butangan og traffic enforcer ang nahisgutang mga dalan kay pawngon ang traffic lights sa pagsiguro nga makita ang dalan nga adunay daghang sakyanan ug mao kini ang hatagan og higayon nga makalabay dayon aron kalikayan ang paghuot niini. (BANAT NEWS)