2 natukhang gipatay

CEBU, Philippines - Duha ka mga tawo nga nitahan na sa Oplan Tukhang sa kapolisan ang gipamusil sa mga wala mailhing mga lalaking nagmotorsiklo sa managlahing dapit dinhi Sugbo.

Samad pinusilan sa liog ug bukton ang naangkon sa 32-anyos nga si Ronald Tundaan, taga Sitio Tabla, Brgy. Sudlon 1 ning Dakbayan sa Sugbo kagahapon sa buntag.

Napalgan kini nga wa nay kinabuhi diha sa daplin sa dalan sa Sitio Satuhan, Brgy. Sudlon 2 sa mao gihapong dakbayan .

Matud pa ni Police Officer 3 Edario Manatad, imbestigador sa Homicide Section sa Cebu City Police Office nga nahinabi sa Banat News nga base sa pamahayag sa ig-agaw sa biktima nga si Amor Cabiles katapusan kini niyang nakita ang biktima pasado alas 11 sa nakalabay nga gabii gikan naghantak sa Sudlon 2 tungod sa pista.

Sumala pa ni Cabiles misakay og motorsiklo si Tundaan, mibiya sa dapit apan nakabantay kini nga adunay laing motorsiklo nga nisunod sa ig-agaw.  Pagkabuntag patay na kini nga nakit-an daplin sa dalan.

Daku ang pagduda ni Manatad nga ang nagpatay ni Tundaan mao ra sab kadtong nagsakay sa motorsiklo nga nagsunod niya apan naglisod sila og establisar kay walay nakahatag kanila og impormasyon bahin sa mga sakay niini ug bisan ang plaka tungod sa kangitngit.

Basi sa nakita sa mga polis sa samad sa biktima posibling gidul-it ang pagpusil sa kilid sa liog niini.

Dugang nakuhang impormasyon sa maong buhatan gikan sa Pardo Police Station, mitahan sa Oplan Tokhang ang biktima apan adunay mga report nga mibalik gihapon kini sa kalihokan sa drugas.

Sa crime scene nakuha sa mga polis ang usa ka basiyo sa bala sa .45 caliber pistol.

Samtang sa lungsod sa Alcantara, patay usab sa pagpamusil ang 24- anyos nga si John Anthony Kilaton nga nagpuyo sa Brgy. Palanas  sa maong lungsod. Matud pa nitahan na sa Oplan Tukhang sa kapolisan ang  biktima pipila ka semana na ang nakalabay.

Sa imbestigasyon sa Alcantara Police, nagtrabaho sa lumber shop ang biktima dihang kalit lang naabot ang usa ka motorsiklo nga adunay sakay nga duha ka lalaki nga nagtabon og bonnet sa mga nawong ug ang backrider kalit nga nipusil sa biktima.

Sulay pa unta nga gidala sa Badian District Hospital ang biktima apan nakabsan kini sa kinabuhi.  Matud pa nga mitahan sa Oplan Tukhang ang biktima niadtong Hulyo 8 ug miangkong tiggamitan kini og illegal nga  drugas.

Apan niadtong Agusto 24 nadakpan kini sa mga polis ang biktima gumikan sa kaso nga direct assault ug gipamulta.  Gisusi pa sa kapolisan kun may koneksyon ba kini sa iyang kamatayon ang kalambigitan sa illegal nga drugas. (BANAT NEWS)