Talisay City Police nangandoy og dugang sakyanan

CEBU, Philippines - Nanghinaut ang kapolisan sa dakbayan sa Talisay nga matagaan sila og bag-ong sakyanan nga ilang magamit sa ilang operasyon.

Matud ni Talisay City Police Station chief Aileen Recla nga kuwangan sila og unmarked vehicle o sakyanan nga walay marka nga mahimo nilang magamit sa operasyon nga dili dali nga mabantayan sa ilang mga subject.

Gitug-an ni PSupt. Recla nga kun patrol car ang ilang gamiton sa tanang operasyon, dili gyud nila madakpan ang mga suspetsado kay makabantay naman daan samtang layo pa sila.

Nasayran nga sa pagkakaron, kadtong adunay pribado’ng sakyanan maoy ilang gamiton apan matud ni Recla nga dili usab maayo nga personal nga sakyanan nila ang pirmi nga gamiton kay mabutang sa peligro ang kinabuhi sa pamilya sa polis nga nanag-iya sa sakyanan nga pirmi nilang gamiton.

“Naa man gyu’y mga ilegalista nga timan-an ang sakyanan nga among gigamit unya pananglitan ron gigamit na diay na sa pamilya sa usa ka polis unya nagtuo ang mga ilegalista nga polis ang sakay,” nagkanayon si Recla.

Gawas sa sakyanan, laing hangyo ni Recla kang City of Talisay Mayor Eduardo Gullas nga unta mahatagan usab sila og handheld radio, M16 ug uban pa nilang kagamitan kay depektuso na.

Si Mayor Gullas nitataw nga mopuno siya og sakyanan sa kapolisan apan wala niya tinua kun unmarked vehicle ba kini o dili.

Mohatag usab siya og armas ug mga bala.  Ang pagpalit niini gilakip sa mayor sa iyang 2017 annual budget nga giduso sa konseho. (BANAT NEWS)