‘Bawos’ sa drug lord

CEBU, Philippines - Duha ka opisyal sa kapolisan nga kanhi nadestino dinhi sa Central Visayas nga gipasanginlang naapil sa ‘drug matrix’ sa nitahan nga “drug lord” nihimakak sa pasangil ug nasagmuyo tungod niini. Si Police Superintendent Rex Derilo nga kanhi nahimong hepe sa Regional Intelligence Division-7 ug sa Logistics Division (R4) sa PRO-7 ayha nabalhin sa Police Regional Office 9 nga nahinabi sa mga tigbalita hugtanon nga milimod sa mga pasangil kaniya.

Si Derilo kinsa nainterbyu sa mga sakop sa media pinaagi sa telepono miingon nga anaa sila karon  sa Camp Crame kay gusto niya nga mopaubos sa imbestigasyon diha sa Criminal Investigation and Detection Group.

Giangkon ni Derilo nga apektado gyud ang iyang pamilya sa maong kontrobersiya ug nasagmuyo siya nga naapil ang iyang pangalan sa drug matrix ni Sabalones.

“I will never do such thing. For 18 years in service sa Cebu wa ko na involve sa mga illegal. Di nako pwede I sacrifice akong reputation,” matud pa ni Derilo.

Kini miingon nga iya lang nasayran ang maong impormasyon human nabalita sa media ug wala man gani kini naka depensa sa iyang kaugalingon.

“Very unfair for me…public perception irreparable na…do you think after this ma-repair pa nato? The damage has (been) done already,” dugang pa ni Derilo.

Panimalos

Si Derilo nagduda nga giamong siya ni Sabalones tungod sa kadako sa kasuko niini kaniya gumikan sa kadaghan sa mga sakop niini nga ilang nadakpan tungod sa hugot nga kampanya batok drugas.

Dihang nadestino pa kini dinhi sa PRO-7 daghan sa mga tawo ni Sabalones ang ilang nasikop ug na-neutralized ug mao kini iyang gidudahan nga paagi aron siya panimaslan.

“Of course ang accusing party are doing something to pin me down, the only way to disarm me is to para e-pin down ko is to implicate ko nila,” pasabot pa ni Derilo.

Alang ni Derilo kung kini man ang mamahimong ganti niya sa pagserbisyo sa katawhan sa Sugbo sulod sa daghang katuigan iya kining dawaton.

“If this is what I get after serving the people of Cebu specially sa anti-illegal drug efforts ako ning dawaton. What is important is that naka-deliver ko, nakaserbisyo ko… ako ning atubangon bisan og dako ning damage sa akong pamilya pero sa mga tawo sa Cebu wala gyud ko na-involved sa illegal drugs,” saysay pa ni Derilo.

Gawas ni Derilo, hugot usab nga milimod sa pasangil si Supt. George Ylanan kinsa kanhi  hepe sa Regional Special Operations Group (RSOG)-7  ug karon atoa na sa Regional Office- 10.

Si Ylanan nahibulong kun nganong naapil kini sa lista nga duha ra man siya ka bulan nga nadestino sa RSOG-7 gikan sa Cebu City Police Office. Ang duha narelibohan sa pwesto dihang milingkod ang bag-ong administrasyon kauban ang daghan pa nga mga polis.Ipakiha silaSi Acting Cebu City Mayor Edgardo Labella mihagit karon sa kapolisan nga ikiha na ang mga tawong gipanganlan nga nalambigit sa illegal drugs aron mahatagan sila og kahigayonan nga matubag ang mga akusasyon kanila.

Matud pa ni Labella bisan ang Ombudsman mahimong magpahigayon og moto propio investigation tungod kay sila mga kawani sa gobiyerno ug kinahanglang ipaagi ang tanan sa proseso. (BANAT NEWS)