CEBU, Philippines - Naabot sa habig sa Dakbayan sa Mandaue ang mga sakop sa City Traffic Management Systems (CTMS) sa Dakbayan sa Lapu-Lapu sa pagpahapsay sa dagan sa trapiko sa duha ka taytayan.
Matud ni Lapu-Lapu City Mayor Paz Radaza nga iya na nga gipahibawo si Mandaue City Mayor Gabriel Luis “Luigi” Quisumbing sayo niining buwana kabahin niini aron ma-monitor sa CTMS personnel ang trapiko sa Mandaue-Mactan Bridge ug Marcelo Fernan Bridge.
“Nagkatupad mi’ng Mayor Luigi sa usa ka regional meeting. Okay ra man siya, niingon nga no problem,” matud ni Radaza.
Subay sab kini sa trapiko nga namugna sa may D.M Cortes Street (kanhi Plaridel Street) tungod sa ongoing road repairs sa maong dapit diin naapektuhan sab ang habig sa Lapu-Lapu.
Sa pagkakaron, wala magamit ang traffic lights sa siyudad ug plano ni Radaza nga mopalit og bag-ong traffic lights sama sa Mandaue nga pulos na mga digital traffic lights.
Gawas sa plano sa siyudad, matud ni Radaza nga nihangyo na sila sa Department of Public Works and Highways apan giproseso pa kini.
“Ongoing pa ang request. Naabot mi sa point nga ang siyudad na lang mopalit,” matud ni Radaza.
Matud ni Radaza nga sa wala pay traffic lights, ang CTMS personnel maoy gi-deploy alang sa pagkontrolar sa dagan sa trapiko kinsa sa kanunay nakig-alayon sa mga sakop sa Traffic Enforcement Agency of Mandaue (TEAM). (BANAT NEWS)