CEBU, Philippines - Silutan ang negosyante nga makalapas sa giamendar nga curfew ordinance sa Dakbayan sa Toledo.
Ang mga internet café ug gaming stations, videokehan, bilyaran ug uban pa ang dili na tugutan nga magpasulod og mga minor de edad sugod sa alas 10 sa gabii hangtud alas 4 sa kadlawon.
Matud ni Konsehal Zosimo Abellanosa, chairman sa committee on peace and order sa konseho, nga masilutan gyud ang mga establesemento nga makalapas pinaagi sa multa nga P1,000 sa unang kalapasan, P2,000 sa ikaduha, ug P3,000 ug pagkanselar sa business permit sa ikatulo ka higayon.
Tumong niini nga malikay ang kabataan nga malambigit sa ginadiling drugas ingon man maminusan ang krimen nga naglambigit sa mga minor de edad panahon sa kagabhion. (BANAT NEWS)