CEBU, Philippines - Patay ang usa ka lalaki human kini gihapsan og piko sa iyang manghod diha sa liog ug sa ulo diha sa Sitio Breeding, Brgy. Santo Niño Sta. Cruz lungsod sa Balamban pasado alas- 10 sa nakalabay nga gabii.
Ang biktima giila nga si Willboy Abalayan Caburnay, 31, samtang ang suspetsado nga manghod mao si Jonathan, 29, nga nagpuyo sa Barangay Prenza, Balamban.
Sumala pa ni Police Officer 1 Renaldo Contado, imbestigador sa Balamban Police nga nahinabi sa Banat News parehong hubog ang duha.
Matud pa ni Contado nga nasuko ang manghod sa dihang gimaymayan sa biktima nga moundang na sa paggamit og ilegal nga drugas ug nikuha og piko dayong hapos sa liog ug ulo sa iyang maguwang nga nakaingon sa kamatayon niini.
Human sa hitabo nadakpan sab sa mga otoridad ang manghod kinsa nitug-an nga nakalimot siya sa iyang kaugalingon ug napuno na siya sa sigeng kasaba sa iyang maguwang.
Si Contado mitug-an nga anaa sa ilang drug watch list si Jonathan ug gani napaubos na kini sa Oplan Tukhang ug usa sa mga mitahan sa ilang buhatan.
Karong adlaw nga Martes pasakaan og kasong murder ang suspek. (BANAT NEWS)