Landfill idangop sa korte
CEBU, Philippines - Pagdangop sa korte ang laing paagi nga masolusyunan ang problema sa Inayawan Sanitary Landfill human gipaablihan ni Cebu City Mayor Tomas Osmeña.
Kini sumala pa ni Bise Mayor Edgardo Labella sa higayon nga walay aksiyon nga buhaton si Osmeña sa kabaho karon sa lugar.
Matud ni Labella nga daghan na kaayo siya og nadawat nga reklamo gikan sa mga tawo, kan-anan ug mga establisemento gumikan sa kabaho ilabi kung kusog ang hangin.
Nanghinaot usab si Labella nga mohimo og aksiyon ang Department of Environment and Natural Resources ilabi na nga nakalapas kini sa Republic Act 9003 kon ang Ecological Solid Waste Management Act.
“In fact, DENR admitted during the executive session that this area is not considered as landfill but a dumping site so I hope that something could be done about this the soonest possible time for reasons of health, environment,” matud ni Labella.
Nasayran nga hugot ang baruganan ni Osmeña nga dili ipasira ang landfill apan si Labella nanghinaut nga irekonsiderar sa mayor ang iyang baruganan tungod kay kinahanglan gyud kining masolusyunan.
Matud ni Labella nga ang mahimo karon sa konseho sa dakbayan mao ang pag-awhag sa executive department nga mohimo og aksyon niini apan kung wala gihapoy aksyon hayan mapugos sila sa pagdangop sa korte alang sa Writ of Kalikasan. (BANAT NEWS)
- Latest
