CEBU, Philippines - Si Archbishop Jose Palma sa Archdiocese of Cebu dili makatambong sa Canonization ni Mother Teresa of Calcutta sa Roma ugmang adlawa gumikan sa mga nagkadaiyang kalihukan apan mahinangpon ug mapasalamaton nga adunay daghan mga Sugbuanon nga motambong niini lakip usab sa mga kaparian.
Malaumon siya nga minilyon ka tawo ang motambong sa canonization ni Mother Teresa sa St. Peters Square sa Roma tungod kay naila man kini sa pagka maayong tawo ug gani sa buhi pa kini gitawag na siyang “the living saint” ug bisan unsang relihiyon nakadayeg kaniya.
Human sa canonization adunay daghang mga thanksgiving celebrations nga ipahigayon sa nagkadaiyang diocese ug lakip na usab dinhi sa Sugbo nga dunay ipahigayon nga Thanksgiving Mass nga anha himuon sa Cebu Metropolitan Cathedral sunod semana.
Gitug-an ni Palma, wala silay personal encounter ni Mother Teresa tungod kay walay higayon nga nagkaabot sila apan sayod siya nga matag higayon nga mohatag og mensahe ang karon usa na ka Santa motuhop gayud kini sa galamhan sa tawong makadungog.
Gibutyag ni Palma nagmilagro ang Santa sa usa ka babaye kansang bana na-coma tungod sa balatian apan dihang kini nag-ampo pinaagi ni Mother Teresa aron maayo iyang bana gidungog kini sa Kahitas-an.
Ang mga nagdumala sa monasteryo nga gitukod ni Mother Teresa dinhi sa Sugbo dili motugot og media interview apan adunay ipahigayon nga novena alang sa canonization. (BANAT NEWS)