BFP-7 nangayo og allowance

CEBU, Philippines - Nanghinaut ang bag-ong Regional Director sa Bureau of Fire Protection Region-7 (BFP-7) nga si FSSupt. Samuel Tadeo nga malakip ang mga kabomberohan sa rehiyon ug probinsiya nga mahatagan og allowance gikan sa kagamhanan sa siyudad sa Sugbo kay ang maong mga bombero nagserbisyo man usab sa dakbayan. Nasayran nga ang personahe sa Cebu City Fire Department adunay allowance nga P4 mil matag buwan gikan sa siyudad.

Wala hinoon mibungat si Tadeo kun pila ang ihatag apan nanghinaut siya nga paminawon ni Cebu City Mayor Tomas Osmeña ang maong hangyo.

Adunay 84 ka personahe ang buhatan sa BFP-7 ug 15 gikan sa probinsiya nga moresponde sa panahon nga adunay sunog o mga kalamidad nga muigo sa Sugbo.  Kagahapon nag-courtesy call ang mga opisyal sa BFP-7 kang Osmeña diin anaa sab si Cebu City Disaster Risk Reduction Management Officer Nagiel Banacia.

 Matud ni Banacia, hatagan nila og usa ka ambulansiya ang maong buhatan ug ibutang kini sa Pari-an Sub-Station. Hatagan usab sila og aerial ladder nga makaabot hangtud sa 16-story building.

 Dugang niini, ang CCDRRMO maoy mo-train sa personnel sa BFP aron mahimo silang emergency medical technicians.

 Gibutyag ni Banacia nga dili pasado ang tanang ambulansiya sa siyudad subay na sa bag-ong standard sa Department of Health ug sa 911. Plano nilang i-upgrade kini ug ibutang sa Brgy. Pardo, Talamban, Taptap ug sa City Hall.  (BANAT NEWS)