CEBU, Philippines - Gipasaligan ni Talisay City Mayor Eduardo Gullas ang mga negosyante og karne sa dakbayan sa Sugbo nga bisan og wala pa na-renew ang Double A Accreditation sa Talisay City Abbatoir ngadto sa National Meat Inspection Services (NMIS) padayon gihapon ang ilang gikasabutan.
Nasayran nga nitumaw ang kabalaka sa mga negosyante tungod sa taho nga expired na ang accreditation sa ihawan sa Talisay. Apan si Mayor Gullas masaligon nga ma-renew ang ilang lisensya mao nga dili angay mabalaka ang mga negosyante og karne kay sigurado man sila sa ilang mga papeles nga gihan-ay na.
Kahinumduman nga nidangop ug nihangyo kang Gullas ang maong mga negosyante nga anha sila magpaihaw sa ilang mga hayupan sa ihawan sa Talisay kay karong tapos buwan pasirad-an na ang ihawan sa siyudad sa Sugbo nga maoy ilang naandan.
Matud pa ni Gullas nga nagpadayon ang ilang operasyon karon bisan og gi-process pa ang ilang pag-renew sa Double A accreditation.
Dugang sa mayor nga gamay ra ang angayan nilang buhaton aron makumpleto ang tanang gikinahanglan.
Samtang si Dr. Santiago Hortel, ang city veterinarian sa Talisay nibutyag nga nalangan sila sa paglihok sa accreditation kay natumong ang expiry date niini sa buwan sa Mayo kun diin busy ang tanan sa piniliay.
Asoy ni Hortel nga dili na bag-o kanila nga dili dayon maka-renew sa lisensya kay nahitabo na kini sa niaging mga katuigan.
Sa pagkakaron, han-ay na ang dokumento alang sa renewal ug gamay nga ayuhonon na lang ang ilang gipadali nga mahuman sa ihawan. (BANAT NEWS)