CEBU, Philippines - Gisugyot ni Konsehal Dave Tumulak ang ordinansahon nga magdili na sa pagpang-refill og mga liquefied petroleum gas sa mga butane canister ingon man ang pagbaligya niini sa Dakbayan sa Sugbo.
Si Tumulak nga maoy pangulo sa committee on peace and order sa konseho sa siyudad nipasabot nga ang iyang gisugyot nga ordinansa gitumong aron malikayan na ang mga sunog nga naggumikan sa butane canisters nga gisudlan og LPG.
Gipasabot ni Tumulak nga kadtong mga maapektuhan niining maong ordinansahon makahimo sa pagpadangat sa ilang sentimento atol unya sa public hearing.
Ang ordinansahon ni Tumulak anaa pa sa committee on laws aron matun-an kun wala ba kini makalapas sa balaud.
Ang mga tig-refill og LPG sa butane canisters giingong nagguol niining lakang ni Tumulak tungod kay segurado man nga mominus ang ilang halin kun did-an na kini nga mabaligya.
Si Tumulak niingon nga nakadungog siya og report nga daghan sa mga tig-refill og LPG ngadto sa butane canisters ang nihimo niini sa mano-mano nga paagi ug walay kasegurohan ang kaluwas sa ilang trabaho.
Nabantayan usab nga bisan ang mga tayaon na nga lata ang gigamit gihapon sa mga backyard refillers.
Sa Dakbayan sa Talisay, gitun-an usab sa konseho ang istrikto nga pagpatuman unya sa balaud may labot sa pag-deliver sa mga butane.
Si Konsehal Doroteo Emit nibutyag nga gihimuan na og ordinansahon ni Bise Mayor Alan Bucao ang pag-regulate sa mga butane.
Si Emit niingon nga sa licensing ila na gyud nga susihon pag-ayo ang produkto kung nakasubay ba sa lagda sa Department of Energy.
Siya nagkanayon nga ang DOE kusganong nirekomendar nga wad-on ang refilling sa butane tungod kay mao kini ang makahatag og peligro sa kadaghanan.
Iyang gihulagway ang nahitabo niadtong niaging semana nga usa ka trak nga nagkarga og butane ang nadisgrasya hinungdan nga ang mga butane nibuto ug niresulta sa pagkasunog sa mga sakyanan.
Apil unya sa ilang ordinansahon kun unsa ang pamaagi sa mga butane nga gikan sa laing lugar gawas sa Talisay.
Sigun pa ni Emit nga kun kinahanglan o kun naghatag gyud og peligro, hayan dili gyud paagion ang mga sakyanan nga magkarga og mga butane.
Dugang ni Emit nga aduna siyay nahibaw-an nga nag-refill og mga butane sa siyudad. (BANAT NEWS)