CEBU, Philippines - Tulo ka tawo, nangamatay sa managlahing aksidente niadtong nakalabay nga mga adlaw. Napasok ilawom sa van ang 37 anyos nga lalaki human kini madasmagi og Canter van samtang nag-drive sa iyang motorsiklo sa may dan F. Vestil, Cebu City. Giila ang biktima nga si Hiram Abordonado, minyo, taga Brgy. Pardo samtang ang drayber sa van mao si Gersua Esconde Jr., hingkod ang panuigon, taga Unit 3 Opra sa Brgy. Kalunasan. Nakaangkon og grabeng bun-og sa lawas ang biktima ug nadala pa sa Cebu City Medical Center apan pipila ka oras ang milabay, namatay kini. Sa imbestigasyon ni SPO2 Filomino Viquezo Jr., sa Traffic Patrol Group nasayran nga samtang nagdagan ang van kalit lang midasmag sa motorsiklo.
Gitanggong na sa selda ang drayber kinsa gikatakdang pasakaan og kaso. Laing nag-motorsiklo ang namatay human nadasmagi og awto ug gibiyaan sa Gov. Cuenco Ave., Cebu City pasado alas 5 sa nakalabay’ng buntag. Patay nang naabot sa CCMC ang biktima nga si Joselito Alvizo, taga Brgy. Banilad. Giingong kolor pula ang sakyanan ang naka-“hit and run” sa biktima.Usa sa mga gisubay karon sa TPG ang mga kuha sa CCTV duol sa nahitabuan.
Patay sab ang laing motorista nga nagsubay sa nat’l highway sa Brgy. Magay, Compostela, Cebu dihang nalagpot sa giluwanan niyang motorsiklo human makadasmag og iro ug naligsan sa nagsunod nga sakyanan, alas 11 pasado sa miaging gabii. Giila ni SPO2 Ramir Maglasang sa Compostela Police ang biktima nga si Noa Vasques Labador, hingkod ang panuigon, taga Brgy. Cogon, Danao City. Matud pa ni Maglasang, gikan sa Danao ang biktima ug padulong sa dakbayan sa Sugbo. Pag-abot sa dapit , kalit lang nga adunay iro nga milabang ug iyang nadasmagan.Sa kakusog sa impact, wala na makapanimbang ang biktima hinungdan nga nalamba ug nalagpot kini sa taliwala sa karsada. Ang nagsunod nga Sedan nga gimaneho ni Restie Gallergo, 32 anyos, taga Maslog, Danao City maoy nakaligis. Si Gallergo kinsa nakalitan sa hitabo, daling mitahan sa iyang kaugalingon ngadto sa kapulisan. (BANAT NEWS)