Jaguar naabot na sa Duljo-Fatima

CEBU, Philippines - Naabot na dinhi sa Dakbayan sa Sugbo ang patay nga lawas ni Jeffrey Diaz, alyas Jaguar gikan sa kaulohan human kini napatay sa kapulisan.

Sa impormasyon nga nakuha sa Banat News mga ala una sa miaging kaadlawon hilom nga naabot ang patay nga lawas ni Jaguar nga anaa karon sulod sa compound sa ilang balay sa Duljo- Fatima.

Usa ka reporter sa Bombo Radyo Cebu nga si Emjan Tirador ang bugtong sakop sa media nga nakasulod sa compound human kini gikuyogan sa usa sa mga higala sa maong pamilya.

Gibutyag ni Tirador nga gibati siya og kahadlok sa iyang pagsulod sa compound apan kini iya lang nga gipadayon aron makuhaan og pamahayag ang pamilya ni Diaz.

Usa sa mga sakop sa pamilya ang naestorya ni Tirador apan kini mihangyo nga sabton una sila nga di pa sila makaatubang sa media kay anaa pa sila sa pagbangotan.

Tungod sa pag-abot sa lawas ni Diaz, usa ka platoon sa mga sakop sa Regional Public Safety Battalion (RPSB-7) ang gipabantay sa maong dapit sumala pa ni Chief Supt. Patrocinio Comendador Jr., ang direktor sa Police Regional Office-7.

Matud pa ni Comendador nga ilaha kini nga gihimo aron mapadayon nga mapatuman ang kahapsay ug kalinaw sa maong dapit sama sa ilang gihimo didto sa Banacon Island diin usab unang napatay sa drug raid si Rowen Secretaria alyas Yawa.

Samtang ang direktor sa Cebu City Police Office, Sr. Supt. Benjamin Santos Jr., mitug-an nga makig-alayon sila sa Philippine Coast Guard (PCG) aron bantayan ang kadagatan duol sa maong barangay.

Atol sa pag-abot sa lawas ni Diaz, girakrakan sa duha ka wa mailhing mga lalaki ang massage parlor nga gikatahong gipanag-iya niini diha sa maong barangay.

Kini ang ikaduhang establisemento nga giingong gipanag-iya ni Diaz nga girapido, una ang pension house sa dakbayan sa Talisay nga giingong naa ubos sa pangalan sa iyang inahan.

Sumala pa ni Comendador nga ilaha sab nga imbestigaran ang maong mga hitabo aron mahibaw-an kung kinsa ang responsabli.

Subay sa maong panghitabo, si Leo Villarino, imbestigador sa CHR-7 miklaro nga makahimo lang sila og imbestigasyon bahin sa kaso ni Diaz kun ang ilang ulohang buhatan magpatabang kanila tungod kay sa Las Piñas man kini nahitabo.

Matud niya, bukas ang buhatan sa CHR-7 alang sa pamilya ni Diaz kun makadesider sila nga modangop kanila. (BANAT NEWS)