CEBU, Philippines - Giduso ni acting Cebu City Mayor Margarita “Margot” Osmeña ang P6 bilyones nga revised annual budget karong tuiga.
Walay bag-ong project nga giapil si Osmeña sa maong budget tungod kay aduna pay wala pa magasto lakip sa P1.5 bilyones nga drainage project.
Sa revised budget, niduso si Osmeña og P300 milyones alang sa amortization sa bayranan sa siyudad sa utang South Road Properties.
Wala giapil ni Osmeña ang P2.6 bilyones nga unang giduso ni outgoing Mayor Michael Rama tungod kay dili pa kini contractual obligation.
Sa bag-ong budget, giduso ni Osmeña ang P2 milyones alang sa pag-renovate ug pagpalit og mga ekipo ug furniture sa bag-ong opisina sa iyang bana nga si Mayor-elect Tomas Osmeña.
Matud ni Margot nga gustong mobalik si Tomas sa iyang opisina sa ikawalong andana sa executive building ug ang ground floor nga opisina ni Rama mahimong opisina sa City Treasurer’s Office.
Gusto ni Margot ug Tomas nga mapaduol sa mga tawo ang City Treasurer’s Office aron sayon alang kanila ang pagproseso sa mga permits.
Tukion sa konseho ang giduso nga budget ugmang adlawa sa ilang sesyon. (BANAT NEWS)