CEBU, Philippines - Sa pagbukas sa klase kagahapon, adunay grupo sa mga militante nga nanawagan nga ipabasura ang K to 12 Program diha atubangan sa usa ka public school sa Dakbayan sa Sugbo.
Matud pa sa grupo nagdugang-dugang lang kini sa gastos ug dili andam ang DepEd-7 aron pagpatuman niini.
Apan si Sheen Darartinao, 19, usa sa mga nagpa-enroll para sa Senior High mihulagway nga dugang gasto sa ginikanan ang K to12 apan alang kaniya nga usa ka estudyante dako kini og matabang aron ilang magamit sa ilang kaugmaon.
Samtang si Jennifer Paraiso, 39, usa sa mga inahan nga nagpa-enroll sa iyang anak sa Senior High, niingon nga dakong tabang ang K to 12 sa mga batang nagpa- enroll sa Senior High ilabi na niadtong mga ginikanang dili makapatungha sa mga anak sa kolehiyo tungod kay human niini may vocational course na man silang nahuman.
“Dili sad sagabal ang K to 12. Ang ubang inahan man gud ang gihuna-huna nila ang gastuhonon dili ang kaayohan sa ilang anak in the future,” pasabot pa niya. Matud ni Department of Education (DepEd) Cebu City District Superintendent Bianito Dagatan hapsay ra ang dagan sa mga opening classes.
Dugang pa ni Dagatan walay librong kinahanglan kay ang mga curriculum materials sa senior high ma-download ra online sa DepEd alang sa mga magtutudlo nga maoy gamiton sa mga estudyante.
Samtang nasuta nga 50 porsiyento sa mga classrooms sa rehiyon ang mahimong maklasehan ug ang mga nabilin gikatakda nga matapos sa buwan sa Oktubre.
Gipasalig ni Victor Yntig, Chief Administrative Officer sa DepEd-7 maatiman ang tanang mga tinun-an sa Central Visayas kay ang mga tunghaan moumol og catch-up plans kun ang mga lawak-saringan dili pa gyud magamit. (BANAT NEWS)