4 sikop sa checkpoint, buy-bust

CEBU, Philippines - Nadakpan ang duha ka tawo nga gituohang gikan namalit og shabu nga nagsakay og motorsiklo dihang nisuway paglikay sa checkpoint sa kapolisan sa Pulpogan, Lungsod sa Consolacion.

Ang nadakpan giila nga sila si Wilbert Banglos, 28, taga Danglag, ug Antonio Tony Balaba, 19, taga Pulpogan, pulos sakop sa maong lungsod.

Si PO1 Raymond Lleve sa Consolacion Police Station niingon nga nahibulong sila sa kalit nga pagbalik sa agi sa motorsiklo nga giluwaan sa duha nga maoy nakaaghat sa mga polis sa paggukod.

Dihang naapsan ug napahunong ang motorsiklo, gitan-aw ang lisensiya apan napakyas sa pagpakita ang drayber nga si Balaba.

Gipangayo sa mga polis ang rehistro sa motorsiklo apan napakyas gihapon hinungdan nga sila gisikop.

Dihang girekisa, nakuha gikan kang Banglos ang upat ka pakete sa shabu.

Samtang duha sab ang nadakpan sa buy-bust operation sa managlahing dapit sa Dakbayan sa Mandaue sa niaging Sabado sa gabii.

Sa Presinto 3 sa Mandaue City Police Office (MCPO) maoy nadakpan si Jackson Besabella, 40, taga Sitio Sta. Cruz, Labogon, kinsa nasakmitan og usa ka gamay nga pakete sa shabu.

Samtang sa Purok Limonsito, Umapad nadakpan si Lloyd Sungahid, 37, ug nasakmit gikan niini ang lima ka gagmay nga pakete sa shabu. (BANAT NEWS)