Hapon, Taiwanese gikawatan
CEBU, Philippines - Dili mominus P30,000 nga iPhone 6 plus ang narekober gikan sa snatcher nga si Vicente Salazar nga gipanag-iya sa usa ka Hapon nga si Takami Hamamoto niadtong Huwebes sa gabii.
Matud ni PO3 Henry Abatayo sa Cebu City Police Office Station 2 nga samtang naglakaw si Hamamoto kalit lang nga gilabni sa suspek ang cellphone niini. Apan ang 26-anyos ug residente sa Riverside Banawa, Guadalupe nga si Salazar napakyas sa pag-ikyas dihang gigunitan siya sa mga tawo nga nakasaksi sa hitabo.
Daling niresponde ang kapolisan ug gidakop ang suspek.
Kasamtangang gitanggong si Salazar sa CCPO Station 2.
Sa laing bahin, usa ka Taiwanese ang biktima sa pagpangawat niadtong Biyernes sa buntag dihang nisulod siya sa usa ka tindahan sa dalan Borromeo ug Climaco, Dakbayan sa Sugbo.
Ang biktima mao si Asraar Ali, temporaryong nagpuyo sa Mactan, Lapu-Lapu City. Si Ali kuyog sa iyang Pakistani nga higala nga nisulod sa tindahan ug gi-parking ang ilang sakyanan sa gawas alas 10 sa buntag.
Duha lang ka minutos ang pagsulod sa tindahan, pagbalik nila sa sakyanan nawagtang na ang Samsung Note 2, $700, Nokia cellphone nga kantidad og P2,000, sunglass case nga gisudlan sa Visa Card ug reading glasses.
“Ila man gibilin nga abli ang bintana,” matud ni PO3 Glee Bumaad.
Ang mga barangay tanod nga sila si Roman dela Cruz ug Mel Mantua sa Pahina Central, Cebu City ang nidala sa biktima ngadto sa Tourist Police Unit aron ma-report ang insidente. (Farrah Cañete, ug Julius Olive Lape
- Latest
