CEBU, Philippines - Niabot sa 55 ka menor de edad ang na-rescue sa kapolisan sa kadalanan sa Dakbayan sa Mandaue sa unang adlaw sa pagpatuman sa curfew niadtong Huwebes sa gabii.
Si Mandaue City Police Office Director Jonathan Cabal nibutyag nga kanunayon na nila ang pagpahigayon sa operasyon ug dili lang kutob sa pag-rescue apan ila usab susihon ang problema sa mga batan-on.
Gikuhaan og impormasyon sa MCPO ang mga bata kung asa sila nagpuyo ug gipakaon sab kini. Ang operasyon gibase sa ordinansa sa dakbayan nga napasar niadto pang 1999 nga nagdili sa kabataan ubos sa 18-anyos nga magsuroy-suroy sa kadalanan gikan sa alas 11 sa gabii hangtud alas 4 sa buntag.
Gidala ang kabataan nga nag-edad og 9 hangtud 11-anyos sa buhatan sa City Social Welfare Services ug didto gi-estoryahan labot sa ordinansa. Dunay mga ginikanan nga niadto sa MCPO niadtong gabhiona aron kuhaon ang ilang mga anak ug apil silang gipahimangnoan ni Cabal sa curfew ordinance.
Nakit-an ni Cabal nga luag ang pagkontrolar sa mga ginikanan sa ilang kabataan hinungdan nga natumpawak ang kadaghanan sa dautang binuhatan. Nalangan ang pagpatuman sa ordinansa gumikan sa daghang dagkung kalihukan matud ni Cabal kinsa nahibulong nganong wala gyud napatuman ang ordinansa sulod sa 17 na ka tuig. Isugyot ni Cabal sa bag-ong mayor nga si Kongresista Gabriel Luis “Luigi” Quisumbing ang pagpahigayon og family symposium. (BANAT NEWS)